Глобалната организација за надзор на храната изјави дека во Појасот Газа се одвива сценарио за изгладнување. Населението е сè повеќе гладно, децата под пет години умираат од причини поврзани со гладот, а хуманитарниот пристап до палестинската енклава е сериозно ограничен
Уште седум Палестинци, вклучувајќи и едно дете, починаа од глад и неухранетост во Појасот Газа, соопшти денеска Министерството за здравство во опколената енклава.
Новите смртни случаи, регистрирани во последните 24 часа, го зголемија вкупниот број на смртни случаи поврзани со глад од октомври 2023 година на 169, вклучувајќи 93 деца.
Министерството предупреди дека хуманитарната криза во Газа продолжува да се влошува, повторувајќи ги повиците до меѓународната заедница и хуманитарните организации веднаш да интервенираат за да се стави крај на страдањето и да се достави итна помош.
Заменик-извршниот директор на УНИЦЕФ, Тед Чајбан изјави дека Газа се соочува со сериозен ризик од глад и дека тоа што може да се види на терен е шокантно.
Според него, повеќе од 320 илјади деца се изложени на ризик од акутна неухранетост.
Глобалната организација за надзор на храната изјави дека во Појасот Газа се одвива сценарио за изгладнување. Населението е сè повеќе гладно, децата под пет години умираат од причини поврзани со гладот, а хуманитарниот пристап до палестинската енклава е сериозно ограничен.
Американскиот претседател Доналд Трамп, пред три дена, по средбата со британскиот премиер Кир Стармер, изјави дека гладот во Газа е реален и најави дека САД ќе воспостават центри за храна.
Од 2 март годинава, израелските власти целосно ги затворија сите гранични премини, интензивирајќи ги условите слични на глад низ целата енклава.
Отфрлајќи ги меѓународните повици за прекин на огнот, израелската војска спроведува офанзива врз Газа од 7 октомври 2023 година, во која загинаа повеќе од 60 000 Палестинци, претежно жени и деца. Бомбардирањето ја опустоши енклавата и доведе до висок ризик од глад.