„Не го носат сметот во ‘Дрисла’, каде го носат“, праша во „Топ Тема“ кандидатот на коалицијата „Искуство за успех“, кој в недела ќе се бори за трет градоначалнички мандат во општина Карпош
Прашан дали има докази дека камиони навечер доаѓаат и фрлаат смет во Карпош и кој го прави тоа, дали од Градот Скопје или противкандидати, Јакимовски кажа дека „тоа се овие истите што доаѓаат да чистат заедно со противкандидатот“
По булеварот „Партизански одреди“ нема смет затоа што има камери, а истите овие “гости“ што доаѓаат да ја чистат општина Карпош, истите тие ноќе со камиони истураат смет покрај празни контејнери за потоа наутро да дојдат да го собираат сметот и да прикажуваат дека тие се спасители.
Ова во вечерашната е емисија „Топ Тема“ на телевизија Телма го кажа актуелниот градоначалник на општина Капрош, Стевчо Јакимовски, кој како кандидат на коалицијата „Искуство за успех“ в недела ќе се бори за трет мандат на чело на општината.
За проблемот со сметот тој ја обвини владејачката ВМРО-ДПМНЕ, од чии редови е неговиот противкандидат, Сотир Лукровски, за кои рече дека водат „ѓубреџиска политика“.
На забелешка на новинарката дека мора да се разграничи дека одредени улици се во надлежност на Град Скопје, а други во надлежност на општините, Јакимовски рече дека подигањето на контејнерите и кантите од индивидуалните домаќинства се во исклучива надлежност на „Комунална хигиена“ и граѓаните за тоа плаќаат секој месец.
Прашан дали има докази дека камиони навечер доаѓаат и фрлаат смет и кој го прави тоа, дали од Градот Скопје или противкандидати, Јакимовски кажа дека „тоа се овие истите што доаѓаат да чистат заедно со противкандидатот“.
Кажа дека имаа фотографии од 23 октомври кои, според него, покажуваат дека сметот кај салата „Партизан“ во Карпош 4 вечерта во 17:30 часот е собран, а наредното утро во 7 часот на истото место има трипати повеќе смет од оној што бил претходно.
„И доаѓаат тој смет да го чистат. И она што е битно, луѓе што ја работата таа работа од ‘Дрисла’ го видоа тој смет и кажаа: ‘Ова не е комунален смет, ова е корпоративен смет, односно од фирми и јасно е, можно ли е од 5:30 навечер до 8 часот наутро да има трипати повеќе смет, а контејнерите сите полни. И она што е најинтересно граѓанин којшто во тој момент не спиел и бил на тераса го видел камионот кој дошол тука да го исфрли сметот“,
рече кандидатот на „Искуство за успех“ за градоначалник на Карпош.
На прашањето дали ваквиот случај го пријавиле во Обвинителство или кај други надлежни служби, Јакимовски рече оти се консултирале со некои обвинители кои им рекле дека ќе побараат снимки од системот „Безбеден град“ (Сејф сити).
„Се размислувавме дали да пријавуваме, дури консултиравме некои обвинители, ни кажаа дека тие ќе побараат ‘Сејф сити’ од полиција, полицијата е нивна (на власта) и тука нема ништо да биде“,
рече Јакимовски.
Тој додаде дека во општината имале повеќе вакви случаи кога навечер чистеле и сликале, а наутро наоѓале повторно фрлен смет до контејнерите.
„Но, она што сакам да им го кажам на граѓаните е дека, нема каде да одат, од понеделник тоа е исклучиво надлежност на градоначалникот на Скопје, ќе ги издржиме со ваква ‘ѓубреџиска политика’ што ни ја наметнаа не само нас, туку и на целиот град. Јас морам да кажам, јас сум многу храбар човек, но ваква храброст, некој да си поигрува со ѓубрето, со граѓаните, треба да си луд да се поигруваш со вакви работи. А ние ако имаме држава како што треба, ако имаме Обвинителство како што треба ова сè може да се констатира преку ‘Сејф сити’. Еве ги повикувам нека отворат истрага и ќе видат камионите каде одат“,
кажа Јакимовски.
Надоврзувајќи се, тој рече дека бил информиран од Јавното претпријатие „Дрисла“ дека камионите што собираат смет од Карпош и од други места не го носат сметот во депонијата.
„Не го носат сметот таму, каде го носат? Од едно место го собираат, се сликаат, на друго место го истовараат“,
рече Јакимовски.
Инаку, во „Топ Тема“ Јакимовски требаше да се соочи со неговиот противкандидат од ВМРО-ДПМНЕ, Сотир Лукорвски со кого в недела ќе ја бијат битката за градоначалничката функција во Карпош, но тој, како што соопшти телевизијата, не се одзвал на поканата.
Во првиот круг од локалните избори за градоначалници Јакимовски освои 8 761 глас, додека за неговиот противкандидат од ВМРО-ДПМНЕ гласаа 10 284 жители на Карпош.