Од денеска, 1 мај, се казнува неносењето заштитна опрема (маска, марама или шал) на устата и носот, потсети министерот Венко Филипче.
Казните кои се предвидени со уредба со законска сила изнесуваат 20 евра за граѓани и 2 000 евра за фирми кои нема да обезбедат опрема за вработените.
„Задолжителното е носење заштитна опрема на устата и носот, во сите јавни објекти како државни институции, маркети, продавници, банки, пошти, јавен превоз, чекални, здравствени институции и слично. Носењето на заштитна опрема е задолжително и на отворени простори, секогаш кога не може да се одржува минимална дистанца од два метри меѓу граѓаните“,
потсетува Филипче.
Опремата не е задолжителна, пак, кога граѓаните граѓаните се во сопствениот двор, возат велосипед или спортуваат на отворено само ако имаат дистанца од два метри, ако патуваат во моторно возило со лица кои заедно живеат, како и ако се наоѓаат на отворено каде може да одржуваат потребно растојание.
Од Владата, пак, потсетуваат и дека денеска, утре и задутре (1, 2 и 3 мај) полицискиот час ќе почнува во 14 часот, а ќе завршува наредниот ден во 5 часот наутро.
За лицата над 67-годишна возраст, пак, овие три дена е дозволено движење од 05 до 11 часот, додека децата и младите до 18 години може да излегуваат од 12 до 14 часот.
На сила е и забраната за групирање на повеќе од две лица на јавни површини, при што во група од двајца не се вбројуваат децата под 14 години на тие лица, но овој исклучок важи само за термините кога е дозволено движење на млади лица, надвор од полицискиот час.