Причините за ваквите мали олеснувања на мерките, според Министерството за здравство, се што бранот полека стивнува, односно се намалува бројот на заболени, а попушта и притисокот за прием во болниците
Од денеска стапуваат во сила новите мерки за заштита од ковид-19, кои вчера, по препорака на Комисијата за заразни болести, беа усвоени од Владата.
Тие содржат делумни олеснувања што се однесуваат на забраната за движење, која наместо како досега од 20 часот ќе почнува од 21 часот и нема да важи за претстојните празници Велигден и Рамазан, ноќта меѓу 1 и 2 мај и меѓу 13 и 14 мај.
Од денеска се отвораат и терасите и градините на угостителските објекти, кои изминатите три недели беа затворени, а според вчерашната одлука и рестораните регистрирани за прослави ќе можат да работат на отворено, но нема да можат да организираат свадби, родендени, крштевки и слично.
Сите овие објекти ќе може да работат до 20:30 часот.
Угостителските објекти на меѓународните аеродроми, како и во објектите за сместување (хотели, мотели, хостели, пансиони и друго) ќе можат да работат како и досега.
Во новиот пакет рестрикции што ги усвои Владата од денеска престанува да важи забраната за организирање и одржување семинари, обуки, работилници, курсеви, конференции и други настани од ваков тип.
Останува забраната за работа на сите вежбални, фитнес-клубови, спортски центри и сали наменети за вежбање во затворен простор, а дејноста може да ја извршуваат на отворен простор, согласно соодветниот наменски протокол.
Причините за ваквите мали олеснувања на мерките, според Министерството за здравство, сѐ што бранот зараза полека стивнува, односно се намалува бројот на заболени, а попушта и притисокот за прием во болниците.
Надлежните, сепак, апелираат граѓаните и натаму максимално да ги почитуваат превентивните мерки за заштита, а посебно да бидат внимателни при празнувањето.
„Подолг период наназад имавме рестриктивни мерки. На почеток полицискиот час, што во еден период даде резултат и кривата се стабилизираше, се израмни и после тоа практично беше парабола и се уште е онаа што ја имитира онаа крива од ноември. Во моментот кога почнаа да опаѓаат бројките воведовме дополнителни рестриктивни мерки, со цел процесот да се забрза, да се испразнат болниците, имајќи предвид дека пред нас се празници и поучени од искуството минатата година дека празниците беа момент на влошување на епидемиолошката состојба“,
рече Филипче.
Министерот за внатрешни работи Оливер Спасовски апелира да се почитуваат мерките и потсети дека и натаму важи забраната за групирање на повеќе од четири лица.
„Оваа година мерките се порелаксирани од лани, но состојбата не е порелаксирана. Имаме сериозна состојба и треба да останеме сериозни и одговорни во овој дел. Затоа апелирам достоинствено да ги поминеме сите овие празници. Да празнуваме во кругот на нашите семејства, да не се групираме во верските храмови и објекти“,
изјави Спасовски.
Според последниот ковид-биланс, регистрирани се 450 новозаболени и починати 28 лица. На инфективните одделенија во земјава се лекуваат 1 368, а бројот на активни случаи е 15 470 лица.