Според него, се разгледуваат можности за соработка во образованието, културата, но и продлабочување на соработката во борбата со организираниот криминал и корупција
Околу половина од нашите инвестиции во целиот Западен Балкан се во Северна Македонија. Ова е дел од договорот „влада со влада“ и значи продлабочување на веќе воспоставеното економско и трговско партнерство меѓу двете земји. Ова денеска во гостување во Дневникот на ТВ Сител го изјави британскиот амбасадор во С Македонија, Метју Лосон, кој најави дека договорот на ниво на влади ќе биде потпишан в четврток во Лондон.
„Ние како Велика Британија сме слободна трговска нација и мислиме дека ова ќе даде додатен импулс оти работевме напорно за формирање британска бизнис-асоцијација, имавме фантастична листа на бизниси тука кои веќе инвестирале и кои сакаат да ја продлабочат нашата врска. Договорот ‘влада со влада’, кој ќе го потпишеме оваа недела во Велика Британија, е дел од тоа пошироко партнерство. Се надеваме дека ова дополнително ќе даде поттик за инвестирање стотици милиони фунти од значење за британската економија и стотици милиони фунти од значење за вашата еконимија, за што сум сигурен дека граѓаните ќе го видат“,
рече тој.
Посочи дека стратешкото партнерство меѓу двете земји во чии рамки се потпишува договорот кој ги поставува условите за поголема трговска размена и инвестиции од Велика Британија во земјава. Причина за тоа рече дека е и тоа што со земјата имаат Договор за трговија потпишан пред пет години, но оти и кај двете страни постоело мислење дека е погодно време да се постигне стратешко партнерство за да се направи дополнителен исчекор.
Според него, се разгледуваат можности за соработка во образованието, културата, но и продлабочување на соработката во борбата со организираниот криминал и корупцијата.
„Со нетрпение го очекуваме пристигнувањето на вашиот вицепремиер Александар Николовски и неговиот колега, вицепремиерот Изет Меџити. Ги финализираме подготовките за големата владина делегација. Она што е важно е дека во четврток ќе има изјави од нашиот министер за трговија заедно со вицепремиерите“,
кажа Лосон.
На новинарското прашање кои се следните чекори по потпишувањето на договорот, рече дека се очекува продолжување на преговорите околу комплицираните прашања на финансисрање, тендерирање, за што очекува дека македонската влада тековно ќе ја информира јавноста за сите процеси.
„Се надевам дека многу брзо ќе ги видиме првите знаци на конкретна соработка, како изградба на болници и железничка инфраструктура. Идејата е Велика Британија сето ова да го овозможи брзо и ќе вложиме напори тоа да го направиме“,
рече британскиот амбасадор во земјава.
Премиерот Христијан Мицкоски и британскиот премиер Кир Стармер во петокот постигнаа согласност за договор за стратешко партнерство меѓу С Македонија и Британија. Мицкоски оцени дека постигнатата согласност за договор за стратешкото партнерство на ниво на влади е привилегија бидејќи, како што рече, земјава е можеби една од ретките која има ваков договор со владата на Обединетото Кралство.