Портпаролот на СДСМ, Дарко Каевски вели дека во Декларацијата стои оти, оддавајќи почит на пожртвуваноста на борците за слобода и демократија, наша должност е постојано да го искажуваме нашиот восхит и почит кон сите оние кои ги дале своите животи за слобода, испраќајќи со тоа силна порака за заедништво, рамноправност и демократија
Владејачкиот СДСМ до Собранието поднесе Декларација за Илинден – најголемиот македонски државен празник. Ова го соопшти партискиот портпарол Дарко Каевски кој зборуваше за содржината на документот.
„Оваа година се навршуваат 120 години од Илинденското востание и создавањето на Крушевската република. Идеалите на таа Република и тоа востание беа инспирација на идните генерации борци за слобода кои во 1944 година на Првото заседание на АСНОМ ја формираа првата македонската држава. Овие настани имаат големо значење за македонската историја и за борбата на македонскиот народ за слобода и сопствена држава“,
рече Каевски.
Тој дополни дека идеалите на Илинденците, македонските партизани и сите што се бореле за слободна и демократска Македонија и за рамноправност и соживот на сите нејзини граѓани, без разлика на нивната верска, етничка или идеолошка припадност, треба да служат како основна водилка за сегашните и идни генерации за слободна, демократска и просперитетна Република Северна Македонија.
„Македонскиот народ, заедно со припадниците на другите народи кои живеат во неа и денес ја продолжуваат борбата за демократија и просперитет, водени од принципите на прогласите на Крушевската Република и Декларацијата за основните права на граѓанинот на демократска Македонија усвоени на Првото заседание на АСНОМ кои денес се преточени во преамбулата на Уставот на Северна Македонија“,
рече Каевски.
Каевски рече и дека во Декларацијата стои оти, оддавајќи почит на пожртвуваноста на борците за слобода и демократија, наша должност е постојано да го искажуваме нашиот восхит и почит кон сите оние кои ги дале своите животи за слобода, испраќајќи со тоа силна порака за заедништво, рамноправност и демократија.
Тој потенцираше дека сето наведено е содржано во Декларацијата што денеска ја поднесоа до Собранието. Рече дека очекува Декларацијата наскоро да се најде пред пратениците и ги повика сите, без разлика од која партија доаѓаат, да ја поддржат и да биде усвоена од македонското Собрание.