Основното јавно обвинителство – Скопје информира дека ќе побара податоци и од надлежните органи во Косово и Албанија за пациенти од тие земји кои се лекувале со одредени терапии во Македонија, како и за евентуални сознанија за илегална препродажба на лекови за третман на онколошки пациенти во тие земји
Тим од јавни обвинители и истражители преземаат дејствија за испитување на наводите кои првично упатуваат на основи за сомнение за сторени кривични дела против здравјето на луѓето и проневера во службата на Клиниката за радиотерапија и онкологија, информираат од Основното јавно обвинителство – Скопје. До овој момент, додаваат оттаму, од Клиниката е обезбеден обемен доказен материјал и документација која веќе е предмет на анализа.
„Се извлекуваат податоците со истории за третманот на групи пациенти кои примале биолошка терапија на Клиниката, како и медицински истории на уште околу 40-ина пациенти за кои се врши директна проверка на податоците за лекувањето. Основното јавно обвинителство Скопје формираше тим од експерти кои вршат анализа на целокупното економско-финансиско работење на Клиниката, како и анализа на податоците од здравствените истории на пациентите“,
соопштија од ОЈО – Скопје.
Надлежните јавни обвинители извршиле распит на повеќемина вработени на Клиниката за онкологија, како и на двајца експерти. Дополнително, како што додаваат од ОЈО – Скопје, во тек се распити и на 20-ина пациенти кои до овој момент доброволно се јавиле на телефонската линија на Обвинителството за да ѝ помогнат на истрагата со свои сознанија.
„Во насока на целосно расчистување на настанот, Основното јавно обвинителство Скопје постапува во координација со Министерството за внатрешни работи, кое по наредба на јавниот обвинител врши анализа на компјутерските податоци одземени при извршените претреси на три локации. Единицата за финансиски истраги при МВР е задолжена да изврши финансиска истрага, а определени дејствија се побарани и од Управата за финансиско разузнавање. Министерството за здравство и Фондот за здравствено осигурување, согласно своите надлежности, треба да изготват и да достават извештаи за работата на Клиниката. Во дејствијата кои се преземаат во однос на наодите од ревизорскиот извештај на Државниот завод за ревизија во врска со Клиниката за онкологија, Јавното обвинителство ќе ги вклучи и ревизорите кои го изготвувале извештајот и ги констатирале состојбите“,
се наведува во соопштението.
Основното јавно обвинителство – Скопје информира дека ќе побара податоци и од надлежните органи во Косово и Албанија за пациенти од тие земји кои се лекувале со одредени терапии во Македонија, како и за евентуални сознанија за илегална препродажба на лекови за третман на онколошки пациенти во тие земји.
Неформалната група пациенти од Клиниката за онкологија вчера до Основното јавно обвинителство – Скопје доставила список од тројца директни пациенти и еден близок сродник на пациент на Клиниката кои би биле вклучени и би добиле директен увид во сите докази прибрани во текот на постапката.
„Во текот на денешниот ден, јавните обвинители ќе ги контактираат тие лица за да ги повикаат во Обвинителството да потпишат изјави за тајност и да ја договорат динамиката на активностите. Основното јавно обвинителство Скопје и сите вклучени институции посветено и транспарентно пристапуваат на истражувањето на овој настан, а за сите резултати од постапката јавноста ќе биде веднаш информирана“,
соопштија од ОЈО – Скопје.