Со предниот дел од возилото удрил во телото на дете родено во 2013 година, кое како пешак попречно го поминувало коловозот надвор од обележан пешачки премин. Од повредите здобиени при сообраќајната несреќа, детето починало на Ургентниот центар, а осомничениот, без да укаже помош на повреденото лице, го напуштил местото, соопштија од ЈО
Основното јавно обвинителство Скопје поведе постапка против 21-годишен скопјанец кој вчера попладне удри десетгодишно дете на булеварот „Никола Карев“, познат како улица Пластичарска, и побегна од местото на несреќата.
Како што информираат од Обвинителството, возачот е осомничен за тешки дела против безбедноста на луѓето и имотот во сообраќајот и за неукажување помош на лице повредено во сообраќајна незгода.
Според Обвинителството, осомничениот, на 12 октомври, како учесник во сообраќајот на јавните патишта, движејќи се по булеварот „Никола Карев“ во насока од исток кон запад, управувал автомобил „мерцедес Е 320“ и брзината на движење не ја приспособил спрема својствата и состојбите на патот, густината на сообраќајот и другите сообраќајни услови, за да може навремено да го запре пред секоја пречка што под дадените услови може да ја предвиди.
„Со предниот дел од возилото удрил во телото на дете родено 2013 година кое како пешак попречно го поминувало коловозот надвор од обележан пешачки премин. Од повредите здобиени при сообраќајната несреќа, детето починало на Ургентниот центар, а осомничениот, без да укаже помош на повреденото лице, го напуштил местото“,
стои во соопштението од ЈО.
Оттаму дополнуваат дека ценејќи ги сите околности, надлежниот јавен обвинител му предложил на судот да определи мерка куќен притвор за осомниченото лице, а дополнително и мерки на претпазливост – привремено одземање на патната или друга исправа за преминување на државната граница, односно забрана за нејзино издавање и привремено одземање на возачката дозвола, односно забрана за нејзино издавање.