За двајца од уапсените, надлежниот јавен обвинител поднел предлог за определување мерка притвор до Основниот кривичен суд Скопје, додека еден осомничен во моментов е во бегство и е недостапен за органите на прогонот
Во врска со оружениот инцидент, кој се случи на 14 октомври на булеварот „Христијан Тодоровски Карпош“ во Чаир, по поднесена кривична пријава од Министерството за внатрешни работи, Основното јавно обвинителство Скопје против три лица поведе постапка за кривично дело – учество во тепачка од член 132 став 1 од Кривичниот законик.
За двајца од уапсените, надлежниот јавен обвинител поднел предлог за определување мерка притвор до Основниот кривичен суд Скопје, додека еден осомничен во моментов е во бегство и е недостапен за органите на прогонот.
„За уште едно лице, четврти учесник во инцидентот, за кое постојат првични сознанија дека со акт на оружено насилство предизвикал тешка телесна повреда – прострелна рана кај оштетениот, во тек е постапка за прибирање докази. Тој осомничен во моментот е на издржување затворска казна за друго дело во КПУ ‘Идризово’“,
информираат од Обвинителството.
Како што информираа вчера од МВР, четири лица учествувале во завчерашното пукање во скопската населба Чаир на улицата „Христијан Тодоровски-Карпош“, а во кое повреден беше 35-годишниот скопјанец Е.А..
Две од лицата, 32-годишниот Л.А. и 30-годишниот И.Т., биле уапсени и се задржани во полициска станица за понатамошна постапка. Другите двајца, А.Р. (29) и М.И. (32), биле осудени лица кои издржувале казна затвор во КПУ „Идризово“, а кои во текот на завчерашниот ден, во времето на извршувањето на кривичното дело, користеле излез од затворот врз основа на работен ангажман.
Пред десет дена во Чаир исто така имаше пукање, во кое беше повредено едно лице.
Пукањето, како што информираа од МВР, се случило на улицата „Цветан Димов“, а во повредениот било пукано од возило „пасат“.