Јавното обвинителство денеска одржало стручен колегиум, кој започнал со едноминутен молк во знак на почит кон настраданите во трагедијата во Кочани, на кој обвинителскиот тим кој постапува по предметот ги презентирал досега преземените дејствија
Министерот за здравство Арбен Таравари попладнево на прес-конференција и официјално потврди дека починатиот пациент кој беше на лекување во Литванија по трагичниот пожар во т.н. кабаре „Пулс“, е 29-годишниот Александар Карадаковски од Кочани
Основното јавно обвинителство Кочани ќе ја запре истражната постапка за Александар Карадаковски, управителот на т.н. кабаре „Пулс“ во Охрид, откако денеска министерот за здравство Арбен Таравари потврди дека тој е пациентот кој им подлегнал на повредите во болница во Литванија и е 60. жртва од трагедијата во Кочани.
„Со оглед на тоа што денешната 60-та жртва од катастрофалниот пожар во Кочани е лице кое претходно беше опфатено со наредбата за спроведување истражна постапка, во својство на управител на правно лице, Основното јавно обвинителство Кочани по прибавување на официјалната документација за настапената смртна околност ќе донесе наредба за запирање на истражната постапка за него“,
соопштија од Јавното обвинителство на Република Северна Македонија.
Јавното обвинителство денеска одржало стручен колегиум, кој започнал со едноминутен молк во знак на почит кон настраданите во трагедијата во Кочани, на кој обвинителскиот тим кој постапува по предметот ги презентирал досега преземените дејствија.
Стручниот колегиум бил запознат со начинот и концептот на истражување и со „стручните аспекти на предметот кои ги има предвид при истражувањето.
„Стручниот колегиум на Јавното обвинителство изрази целосна поддршка за досегашната работа на обвинителите, кои во моментов паралелно водат истражна и предистражна постапка од широк опсег со цел целосно испитување на одговорноста за овој настан“,
се наведува во соопштението.
Оттаму додаваат дека сите капацитети на Јавното обвинителство се ставени на располагање на тимот за ефикасно завршување на истрагата.
Од Обвинителството во вторникот информираа дека дејствијата што ги преземаат вклучуваат распити, анализи и вештачења од голем обем, а кои се однесуваат на повеќе различни институции.
Но, поради зачувување на трајноста на постапката и за да се спречи компромитирање на доказите, од Обвинителството посочија дека во моментов не се во можност да споделат повеќе детали за активностите.
Министерот за здравство Арбен Таравари попладнево на прес-конференција и официјално потврди дека починатиот пациент кој беше на лекување во Литванија по трагичниот пожар во т.н. кабаре „Пулс“, е 29-годишниот Александар Карадаковски од Кочани.
Споделувајќи информации што ги добиле од лекарите во Литванија, директорот на болницата „Св. Наум Охридски“, Небојша Настов соопшти дека Карадаковски починал како резултат на директното оштетување на голем дел од дишното стебло од речиси 90 проценти, поради вдишениот чад, што резултирало со смрт. Дополнително, како што посочија Настов и Таравари, Карадаковски имал 36 отсто изгореници по телото, главно кај главата, вратот и горните екстремитети. Овие изгореници предизвикале рани и инфекции, а на 1 април на Карадаковски му откажале и бубрезите, поради што бил ставен на дијализа.
„Колегите во Литванија со кои редовно се брифиравме, ни потврдија дека било утврдено оти е оштетен голем дел од дишното стебло кај Карадаковски поради што дошло до влошување на состојбата и подлегнување на повредите“,
изјави Настов.
На прес-конференцијата беше даден осврт на згрижувањето на Карадаковски утрото по пожарот, кога околу 6 часот бил примен во болницата „Св. Наум Охридски“, по што во рок од 24 часот бил организиран него транспорт во Литванија.
Тој бил еден од четворицата најкритични пациенти кои се пренесени на лекување надвор од државата.
Телото на Карадаковски ќе биде транспортирано во Македонија, а обдукцијата на телото ќе биде извршена во Судска медицина во Скопје, соопшти министерот на здравство.
За трагедијата во т.н. кабаре во Кочани, локалното Основно јавно обвинителство отвори истрага против вкупно 27 физички и три правни лица. На 21 лице им е одреден ефективен затворски притвор притвор од 30 дена, додека тројца осомничени добија куќен притвор. На тројца, меѓу кои ни Карадаковски, не им беа одредени никакви мерки бидејќи се наоѓаат на лекување.
Во одделна истрага, исто така, поврзана со пожарот во Кочани, што ја отвори Основното јавно обвинителство за гонење организиран криминал и корупција (ОЈО ГОКК) во притвор завршија седум поранешни високи полициски службеници од Штип и Кочани.
Изнесувајќи ги првичните детали околу отворената истрага државниот обвинител Љупчо Коцевски на 21 март рече дека тројца од вкупно 27-те осомничени физички лица се јавуваат како одговорни лица, косопственици или управители во извесен период во правното лице, чија подружница е т.н. кабаре-клубот „Пулс“.
Според регистарот на Министерството за економија и податоците во Централниот регистар, носител на лиценците за кабаре – легални и фалсификуваната, е фирмата „ММММ кафе“ ДООЕЛ од Кочани, каде како сопственик и управител фигурира Александар Карадакоски.
Инаку, за вистински сопственик на т.н. кабаре се смета Д.Ј., во чиј дом, возило и два угостителски објекти во рамки на истрагата се вршени претреси.