Обвинетите, на 31 мај, не постапиле според прописите и наредбите со кои се определуваат мерки за сузбивање и спречување на ширењето на ковид-19
Основното јавно обвинителство-Скопје поднесе предлог за издавање казнен налог против вкупно 15 лица за кривично дело непостапување според здравствените прописи за време на епидемија од член 206 став 1 од Кривичниот законик.
Како што соопшти ЈОРМ, обвинетите, на 31 мај, не постапиле според прописите и наредбите со кои се определуваат мерки за сузбивање и спречување на ширењето на ковид-19. Поточно, тие се обвинети дека не ја почитувале одлуката на Владата со која е забрането групирање на повеќе од пет лица на јавни површини.
„Тие се собрале на булеварот ‘Илинден’, во близина на зградата на Владата, каде што учествувале на јавен собир под мотото ‘Стоп кршење права и слободи, стоп вакцини, стоп 5Г-антени, стоп лажна пандемија’. Обвинетите биле затекнати од полициски службеници при извршена контрола на местото на настанот“,
се наведува во соопштението.
Надлежниот јавен обвинител, се додава, предложи на секој од обвинетите да му биде изречена парична казна од по 100 дневни глоби, при што висината на една дневна глоба да биде определена на 20 евра во денарска противвредност.