Основното јавно обвинителство-Скопје бара парична казна од 10 илјади евра од поранешната директорка на Клиниката за кожни болести, обвинета за кривичното дело пренесување заразна болест.
„Надлежниот јавен обвинител на судот му предложи на обвинетата да ѝ изрече парична казна од 40 дневни глоби со вредност на една дневна глоба од 250 евра, односно вкупна парична казна од 10.000 евра во денарска противвредност“,
соопштија од Обвинителството.
Како што наведуваат во известувањето, обвинетата на 29 февруари се вратила во земјава од регион во Република Италија преку граничниот премин „Табановце“. Но, притоа таа постапила спротивно на мерките и заклучоците на Владата согласно кои сите граѓани што се враќаат од ризичните земји со зголемен број заболени од ковид-19, особено од Република Италија, имаа обврска да останат во домашна изолација во траење од 14 дена од денот на влегување во земјава.
Исто така, со заклучоците, на сите вработени во државни и локални институции и претпријатија им беше наложено, доколку во претходните две недели патувале или живеат со некој што патувал во земјите од среден или висок ризик за ширење на заразната болест, да не доаѓаат на работа и за тоа да ја известат институцијата каде што работат.
„Но, обвинетата, иако како здравствено лице била свесна за ризикот, продолжила со своите работни обврски на Клиниката, а на 7 март била присутна и одржала предавање на симпозиум од областа на дерматолошките болести, со што ги довела во опасност сите учесници, предавачи, организатори и вработените на Клиниката. На овој начин таа заразната болест им ја пренела на седум свои колеги пред самата да биде хоспитализирана на Клиниката за инфективни болести со позитивен наод на ковид-19“
се наведува во соопштението.