„МВР како орган надлежен за откривање на кривични дела извршило првични проверки и ќе продолжи да постапува во координација со обвинителството“, велат од оваа институција
Откако вчера СДСМ го обвини ВМРО-ДПМНЕ дека направила оперативен план кој се однесува на пласирање на лажни анкети за рејтинзите на политичарите и партиите кои во изминатиот период се објавувани во емисијата „Објектив“ на Македонската радио-телевизија (МРТ), Обвинителството денеска информира дека до него е доставено известување Министерството за внатрешни работи за примена кривична пријава од три лица во врска со настанот.
„МВР како орган надлежен за откривање на кривични дела извршило првични проверки и ќе продолжи да постапува во координација со обвинителството“,
велат од оваа институција.
Претходно од Јавното обвинителство информираа дека со Комисијата за следење на изборни нерегуларности ги следат сите информации за овој случај.
„До овој момент до Јавното обвинителство за конкретниот настан не е доставена кривична пријава ниту од евентуални оштетени лица, ниту од МВР како орган надлежен за откривање на кривични дела“,
велат од Обвинителството.
Оттаму велат дека инструментот на допрен глас, како и досега, се користи доколку органите надлежни за откривање на кривични дела не постапуваат согласно надлежностите.
„Самата политичка партија во конкретниот случај веќе најави дека има намера да бара правна заштита и преку механизмите за граѓанска одговорност за клевета“,
соопштија оттаму.
Како што информираа Обвинителството, од Комисијата на ЈО за следење на евентуални нерегуларности поврзани со извршување на кривични дела од Глава шеснаесет – Кривични дела против изборите и гласањето од Кривичниот законик и други кривични дела кои би биле сторени при организирањето и спроведувањето на изборите има оформено еден предмет врз основа на наводи изнесени од една политичка партија кои се однесуваат на сомненија околу финансирање на изборна кампања на друга партија.
„Предметот е испратен на постапување на надлежно Oсновно јавно обвинителство“,
се вели во соопштението од Обвинителството.
Институтот за политички истражувања Скопје (ИПИС), кој во соработка со МРТ изминатиов период спроведе серија испитувања на јавното мислење во пресрет на двојните избори, вчера најави дека ќе поднесе тужби по обвинувањата кои ги изнесе СДСМ оти анкетите биле лажни и по нарачка на ВМРО-ДПМНЕ.
Од Институтот додаваат дека спроведувањето и емитувањето на анкетите на јавното мислење во предизборието е исклучиво во соработка на ИПИС и МРТ и дека во процесот не е вклучена каква било трета страна, односно друг правен субјект, организација или физичко лице.
„Во однос на прецизноста и методологијата на самите анкети, ИПИС со сето свое искуство и минат труд стои зад резултатите кои се објавуваат. За точноста на податоците од истражувањата на ИПИС доволно е да се направи единствена компарација со претходните изборни циклуси или референдуми во изминатите петнаесетина години каде што јасно може да се види дека сите проекции на изборните резултати кои ги објавил ИПИС се точни, односно во рамки на дозволената маргинална грешка“,
додаваат од Институтот.
Политичкиот аналитичар Петар Арсовски, чија агенција во соопштението на Македонската радио-телевизија (МРТ) е посочена како една од ангажираните за спроведување анкети за јавното мислење вели дека тој и неговата агенција „Креатиф“ не се вклучени во спроведувањето на анкетите и во изведувањето на заклучоците од истражувањата, туку само во делот на анализа и коментар на податоците, односно бројките што ги подготвиле во ИПИС.
„Со внимание го следам развојот на настаните и анализите на МТВ и во овој момент можам да кажам дека моето учество во анализите за кои станува збор, не вклучува спроведување на анкети, туку анализа и коментар на бројки и трендови. За евентуална проверка или валидација на податоците добиени од спроведените истражувања морам да ве упатам на агенцијата која ги спроведува истражувањата“,
изјави Арсовски.
Покрај од ИПИС, денеска и од Македонската радио-телевизија ги отфрлија како неосновани обвинувањата на СДСМ оти анкетите на Институтот кои беа објавени на МРТ се лажни и по нарачка на ВМРО-ДПМНЕ.
Владејачкиот СДСМ, објавувајќи документи, денеска обвини оти ВМРО-ДПМНЕ направила оперативен план кој се однесува на пласирање на лажни анкети за рејтинзите на политичарите и партиите кои во изминатиот период се објавувани во емисијата „Објектив“ на јавниот сервис и за други активности како пласирање лажни вести.
По ваквите обвинувања, ВМРО-ДПМНЕ најави дека ќе поднесе тужба за клевета против СДСМ.