Државниот јавен обвинител Љубомир Јовески денеска го одржа годишното обраќање. Говорот траеше осум и пол минути, а почетокот беше резервиран за политичарите.
„Зад нас е 2019-та, година во која Јавното обвинителство беше поставено пред многубројни предизвици. Година во која ја покажавме неселективноста во спроведување на законите, година во која на политичарите и моќниците им стана јасно дека одлуките не се носат во нечии кабинети, туку нив ги носат обвинителите самостојно. И затоа вие колеги обвинители ја имате мојата целосна поддршка да не потклекнувате на ничии притисоци, да работите во рамките на вашата надлежност, без мешање од страна“,
изјави државниот јавен обвинител Љубомир Јовески.
Јовески потоа се пофали дека обвинителството направило големи чекори особено кога е во прашање транспарентноста на институцијата. Спомена и дека по подолго време повторно се отвораат постапки по допрен глас.
Потоа призна дека во Обвинителството има и слабости, но смета дека отворените постапки говорат дека институцијата работела напорно и посветено.
„Покренати се постапки и против јавен обвинител, судија, пратеник, службени и одговорни лица. Јавните обвинители во текот на 2019 година отворија и постапуваа по неколку предмети во кој се гонат лица за сторени кривични дела од областа на висока корупција. Обвинителството покажа дека има капацитет, самостојност и стручност да се справи со секаков вид на криминал и да води постапка против секој кој сторил кривично дело без оглед на неговата позиција“,
рече Јовески
Еден од најголемите предизвици годинава, според Јовески, била опасноста да пропаднат предметите на СЈО. Поради тоа и одлучиле да ги преземат во редовното обвинителство.
Станува збор за вкупно 25 предмети судски предмети, 19 истраги, 6 предистраги, 80 други предмети кои се однесуваат на предистражна постапка и барање за воспоставување надлежност. Како што завчера објави „360 степени“, од вторникот сите истраги од СЈО конечно се распределени по јавни обвинителства.
Јовески бара закон и пари од власта
Јовески потоа повторно упати порака до извршната и законодавната власт за законот за јавно обвинителство и обвинувањата кон институцијата.
„Она што е неопходно, не заради Брисел, е носење на нов закон за јавно обвинителство, но ќе подвлечам квалитетен и издржан закон, а не решенија кои ќе бидат резултат на дневно-политички договарања. Подобро да не се донесе закон, отколку да се изгласа закон со вакви решенија… Сакам да ве уверам, но и да одговорам на некои неосновани и паушални обвинувања. Работиме професионално, без никакви притисоци од надвор, не ставаме предмети под тепих, но не дозволуваме избрзување или обвинувања без докази. Обвинителството ги прибира и анализира доказите и врз основа на нив донесува јавнообвинителски одлуки, со кои одговараме на основната цел – функционирање на правниот систем. Ние сме за вистината, без оглед кој ја зборува. Ние сме за правдата врз основа на факти и докази“,
изјави државниот јавен обвинител Љубомир Јовески.
Потоа упати порака до извршната власт која се однесува на парите.
„Во текот на годината презедовме активности за отворање и ставање во функција на 4 истражни центри и тоа во Основното јавно обвинителство за гонење на организиран криминал и корупција и во основните јавни обвинителства Куманово, Тетово и Скопје. Сакам да се обратам и до надлежните да имаат разбирање за неопходната финансиска поддршка за да можат истражните центри да станат функционални“,
Веројатно не случајно, веднаш откако побара повеќе пари од Владата за истражните центри, Јовески кажа дека годинава се подобрени условите во вкупно 11 обвинителства. Но, во речиси сите случаи парите за зафатите биле од странски донации, а не од домашниот буџет.
Од следната година обвинителите „под лупа“
Последната порака на Јовески беше упатена до самите обвинители најавувајќи дека ќе се „чешла“ работата на секој обвинител поединечно.
„Во оваа пригода сакам да најавам дека поединечо ќе се оценува работата на секој јавен обвинител преку систем за утврдување на резултатите на обвинителите. На овој начин ќе се евидентира работата и ќе се детектираат слабостите во работата на секој јавен обвинител со единствена цел – зголемување на ефикасноста во постапувањето“
изјави Љубомир Јовески.