Според обвинителката, случајот е пример за длабоко вкоренета корупција во општеството
Двајцата обвинети во случајот „Геријатрија“ пред Основниот кривичен суд Скопје денеска се изјаснија дека не се чувствуваат виновни за делата што им се ставаат на товар.
Во случајот обвинети се Мухсин Арифи, директор на ЈЗУ Специјализирана болница за геријатриска и палијативна медицина „13 Ноември“-Скопје кој се гони за примање поткуп и Блерим Амити кој е обвинет за примање награда за противзаконито влијание.
Според обвинителниот акт, Арифи побарал имотна корист од 20 000 евра за да овозможи болнички прием на пациентка во тешка здравствена состојба. Амити, кој претходно го познавал сведокот, се понудил да посредува и ја примил паричната сума, при што бил фатен на самото место од страна на полицијата.
Обвинителката Искра Хаџи Василева во воведните зборови пред судот нагласи дека случајот е пример за длабоко вкоренета корупција во општеството.
„Пропорциите и интензитетот на корупцијата се толку многу длабоки што нѐ потсетуваат дека ја засегаат секоја сфера од нашето живеење“,
рече таа.
Според неа, станува збор за директно, грубо барање мито од страна на директорот – износ кој бил предмет на преговори, а на крајот бил прифатен како минимален за да се изврши службено дејствие што инаку морало да се изврши без надомест.
Хаџи Василева посочи дека обвинетите дејствувале од лукративни причини, со цел лично богатење искористувајќи ја ранливоста на пациентката и нејзината потреба за итна медицинска грижа.
Обвинителката додаде дека сведокот, кој е давател на доживотна издршка на пациентката, го пријавил случајот, а доказите кои ќе бидат презентирани пред судот јасно ги документираат коруптивните дејствија низ неколку сукцесивни настани.
Одбраната на обвинетите најави дека во текот на кривичната постапка ќе презентира докази во вид на статут, процедури и законски одредби кои произлегуваат од институцијата што ја застапувал обвинетиот Мухсин Арифи.
Преку нив, како што рече одбраната, ќе бидат отворени неколку правни прашања со цел да се докаже дека Арифи, како и Амити, не можеле, односно немале намера да извршат какво било кривично дело.
„Доказите што ќе бидат изнесени и презентирани во понатамошниот тек од постапката, убедени сме дека ќе упатат на недоразбирање што настанало во овој т.н. кривично правен настан“,
рече одбраната.
Судскиот процес го водат судиите Ленка Давиткова и Илија Трпков.
Инаку, Основното јавно обвинителство за гонење организиран криминал и корупција (ОЈО ГОКК) обвинителниот акт го поднесе на 4 јули годинава.
Претходно директорот на Геријатрија и уште едно друго лице беа приведени на 8 април, а наредниот ден Основниот кривичен суд Скопје го прифати предлогот на ОЈО ГОКК и им определи 30-дневен притвор.