На прашањето дали тој се чувствува како оштетена страна во целиот процес, одговори позитивно и дополни оти сака и скопската градоначалничка да одговара за тоа што му го направила
Во Кривичниот суд денеска продолжи судењето на Сулејман Љамалари кој е осомничен за грубо насилство врз градоначалничката на Град Скопје, Данела Арсовска, откако на 11 јули годинава, како што се наведува во обвинението против него, ја нападнал Арсовска физички и вербално додека таа била на терен на територија на Општина Чаир. На денешното рочиште, меѓу другото, обвинетиот цврсто ги негираше обвинувањата дека ја нападнал градоначалничката и рече оти тој во целиот случај не бил напаѓач, туку жртва.
„Тој ден јас не нападнав никого, туку бев нападнат од градоначалничката. Таа пријде кон мене со телефон во раката, го впери кон мене и почна да снима. Јас само со рака ѝ мавтав, сакав да ѝ го тргнам телефонот бидејќи немаше право да ме снима неовластено. Немав намера да ја повредам“,
рече Љамалари.
Тој воедно вели дека ситуацијата ескалирала во вербална, а потоа и во физичка пресметка за многу брзо време и оти Арсовска го удрила со нога во пределот на натколеницата на левата нога, додека тој стоел, не преземајќи ништо. Тој кажа дека на местото дошол со електричен тротинет, кој постојано бил со него и токму тоа значи и оти тој не извршил никаков напад. Љамалари кажа дека целиот инцидент бил снимен од страна на градоначалничката и нејзиниот тим и оти сите докази се кај нив, а рече и дека по инцидентот не можел веднаш да побара медицинска помош оти бил задржан во полициска станица.
„Да, имаше пцости од двете страни. Таа ми кажуваше навредливи зборови, конкретно ги паметам. Од нејзината екипа исто така имаше навреди. Јас не се сеќавам дали пцуев кон другите, но кон неа – да, имаше обострани навреди“,
кажа обвинетиот.
На прашањето дали тој се чувствува како оштетена страна во целиот процес, одговори позитивно и дополни оти сака и Арсовска да одговара за тоа што му го направила. Неговото сведочење е сосема различно од тврдењата на Обвинителството, но и на оштетената, градоначалничката Данела Арсовска која на првото рочиште одржано во јули годинава за Љамалари кажа дека бил исклучително агресивен и оти во нападот кој траел повеќе од четириесет минути таа се чувствувала загрозено, несигурно и исплашено.
Обвинителството, преку обвинителот Александар Давчевски, останува на тврдењето дека Јамалари пристигнал со електричен тротинет, ја нападнал физички и вербално Арсовска, ѝ нанел телесни повреди и упатил сериозни закани.
За потсетување, Основното јавно обвинителство (ОЈО) Скопје поведе постапка против две лица за инцидентот што се случи на средината на јули, кога во скопски Чаир вербално и физички беше нападната градоначалничката на Град Скопје, Данела Арсовска.
Иако беше побаран затворски притвор за обвинетиот, судот првично му определи домашен притвор, а по жалбата на обвинителството, оваа одлука беше преиначена во ефективен затворски притвор.
Градоначалничката на Скопје, пак, по инцидентот доби 24-часовно полициско обезбедување.