Кривичниот суд бара судењата за кои има услови да се одржат и потенцира дека каква било злоупотреба на мерките против коронавирусот со цел одолговлекување на судењата строго ќе се санкционираат
Судењето за предметот „Титаник“ за изборни нерегуларности денеска се одложи бидејќи еден од обвинетите не се појави во судница со образложение дека користи една од владините мерки за превенција од коронавирусот.
Обвинетиот Станко Коруновски доставил поднесок до Судот со кој го известува дека ја користи мерката донесена од Владата за отсуство како родител на дете на возраст до 10 години.
Ист поднесок за користење на мерката поднеле и адвокатите Сања Алексиќ и Петар Василев.
Денешното рочиште на кое требаше да бидат сослушани петмина сведоци ќе продолжи на 25 март.
Во овој предмет освен експремиерот Никола Груевски, кој е во бегство, обвинети се и Кирил Божиновски, Миле Јанакиески, Гордана Јанкулоска, Билјана Бришкоска-Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска. Тие се осомничени за злосторничко здружување, злоупотреби во изборниот процес и финансирањето изборна кампања.
Инаку, од Кривичниот суд денеска во соопштение до јавноста порачаа дека сите закажани судења за кои постојат услови, сè до евентуално нови упатства од Министерството за правда или Судскиот совет, ќе се одржат. Оттаму потенцираат дека какви било злоупотреби на препораките за заштита со цел одолговлекување на судењата строго ќе се санкционираат.