Јавен обвинител со поднесеното обвинение до Судот достави и предлог за продолжување на претходно определената мерка притвор за обвинетиот
Основното јавно обвинителство (ОЈО) Скопје поднесе обвинение против возачот што на 1 јули година со мотор усмрти 68-годишен маж на пешачка патека во центарот на Скопје. Тој се гони за две кривични дела, од кои првото е за тешки дела против безбедноста на луѓето и имотот во сообраќајот, а второто е за неукажување помош на лице повредени во сообраќајна незгода.
Според образложението на обвинението за настанот, на 1 јули годинава, во вечерните часови, обвинетиот управувал со мотор „кавасаки“ по пешачка патека на улицата „Јордан Хаџи Констатинов-Џинот“, наменета исклучиво за движење на пешаци.
„Моторот го управувал без воопшто да поседува возачка дозвола и спротивно на сообраќајните прописи, без да ја приспособи брзината на движење. Иако со моторот се движел со брзина од 35 километри на час, што е помала од максимално дозволената на пат во населено место, сепак за наведената локација таа била поголема од безбедна брзина, со оглед на тоа дека станува збор за пешачка патека, на која можел моторот единствено да го турка, а не да го вози“,
се вели во образложението на обвинението.
Затоа, како што велат од Обвинителството, обвинетиот не успеал навреме да запре и удрил во пешакот Југослав Николовски, роден 1957 година.
„При ударот пешакот и сопатникот на моторот се здобиле со телесни повреди, а обвинетиот го оставил моторот и беа да им укаже помош на повредените избегал од местото на несреќата. Повредениот пешак со тешки телесни повреди бил пренесен во Ургентниот центар во Скопје, каде починал. Сопатникот на моторот се здобил со телесни повреди“,
се вели во поднесеното обвинение.
Јавен обвинител со поднесеното обвинение до Судот достави и предлог за продолжување на претходно определената мерка притвор за обвинетиот.
Кривичниот совет на Основниот кривичен суд Скопје на 7 јули ја преиначи одлуката на судија на претходна постапка и му одреди мерка притвор на обвинетиот Ф.Љ. (25), возачот на мотоцикл кој на 1 јули на пешачка патека на кејот на Вардар, во близина на Паркот на франкофонијата, го прегази 68-годишниот Југослав Николовски и избега од местото на настанот.