„На бројот 070 399 050 или на [email protected] граѓаните можат да пријавуваат незаконита, партиска или приватна употреба на службените возила“, објави директорот на СОЗР, Ивица Томовски
Директорот на Службата за општи и заеднички работи (СОЗР), Ивица Томовски, попладнево го објави бројот на кој граѓаните отсега ќе може да пријавуваат злоупотреба на службените возила во сопственост на државата.
„Од денеска на бројот 070 399 050 или на [email protected] граѓаните можат да пријавуваат незаконита, партиска или приватна употреба на службените возила. Сите пријави ќе се проследуваат до надлежните органи за понатамошно постапување“,
пишува Томовски во објава на Фејсбук.
Но, за граѓаните да може да пријават злоупотреба, службените возила најпрво треба да ги заменат старите со нови црвено-жолти регистарски таблички со кои ќе бидат полесно распознавани. Процесот е практично на почеток бидејќи, како што претходно денеска изјави Томовски, досега се обележани околу 500 возила.
Вкупниот број на службени возила кои треба да добијат вакви таблички, пак, изнесува околу 7 500. Директорот на СОЗР, сепак, е оптимистичен дека промената на табличките целосно би завршила за две недели.