Учесниците во кампањата, покрај тоа што се залагаат за брзо затворање на електраните на јаглен и итно усогласување на загадувањето од тешката индустрија со соодветната регулаторна рамка, бараат и граѓанско учество во одлучувањето за еколошките дозволи
Што поскоро да се затворат термоелектраните на јаглен, ќе биде едно од главните прашања на кои ќе се фокусира регионалната кампања „Обединет Балкан за чист воздух“ која годинава ќе се одржи по вторпат.
Кампањата започна од денеска (1 декември), а нејзината цел е да се подигне свеста на граѓаните во регионот за причините и последиците од аерозагадувањето, можните начини за подобрување на квалитетот на воздухот и борбата за поздрава животна средина преку регионална солидарност.
„Оваа година, кампањата ќе се фокусира, меѓу другото, на последиците од загадувањето предизвикано од електраните на јаглен, како и загадувањето кое потекнува од тешката индустрија“,
велат од „Обединет Балкан за чист воздух“.
Оваа кампања е имплементирана од Европскиот фонд за Балканот, а е поддржана од многубројни организации од целиот регион: Еко форум од Зеница, Институт за територијално управување со животната средина од Тирана, Сбункер и Фондацијата Балкан грин од Приштина, Air Care од Скопје, ОЗОН од Подгорица, Регулаторниот институт за обновливи извори и животна средина и Отворено училиште во Белград.
Граѓаните да бидат дел од одлучувањето за еколошки дозволи
Учесниците во кампањата покрај тоа што се залагаат за брзо затворање на електраните на јаглен и итно усогласување на загадувањето од тешката индустрија со соодветната регулаторна рамка, бараат и граѓанско учество во одлучувањето за еколошките дозволи.
„Бараме и граѓаните да бидат вклучени во носење одлуки за еколошки дозволи и други документи во врска со производните погони“,
велат од „Обединет Балкан за чист воздух“.
Јагленот е најголемиот загадувач, а економијата на Западен Балкан губи поради загадениот воздух
Во најавата за почетокот на кампањата, учесниците порачуваат дека согорувањето на јаглен е најголемиот поединечен извор на загадување на воздухот во Западен Балкан, при што главна улога играат термоелектраните.
„Самата термоелектрана ’Угљевиќ‘ испушта повеќе сулфур диоксид (107 402 тони во 2020 година) од вкупните дозволени емисии на сите постројки опфатени со националните планови за намалување на емисиите (103 682 тони). Оттука, само оваа електрана ги надминува сите годишни вредности собрани заедно. Увозот во ЕУ на електрична енергија произведена од Западен Балкан изнесува 0,3 отсто од електричната потрошувачка на ЕУ, но емисиите на сулфур диоксид од ова производство претставуваат 50 отсто од сите емисии на термоелектраните на ЕУ“,
наведуваат учесниците во кампањата.
Освен во индустријата, јагленот се користи и во домаќинствата и во топланите и затоа тие сметаат дека потребно е негово укинување од употреба со што ќе се отстрани и главниот загадувач.
Од загадениот воздух, порачуваат од „Обединет Балкан за чист воздух“, пак, губи и економијата.
„Загубата на бруто домашниот производ поради загадениот воздух на Западен Балкан само во 2016 година изнесува 8,5 милијарди евра. Наместо да се градат и реновираат термоелектрани, средствата од буџетот би можеле да се насочат за социјални програми и преквалификација на работниците, како и изградба на соларни централи на местото на рудниците за јаглен кои би ги замениле капацитетите за производство на електрична енергија. На тој начин, трансформацијата на индустријата би можела да биде најзелена на континентот“,
велат од „Обединет Балкан за чист воздух“.