Греењето во објектите и домовите, индустријата и постарите автомобили се главните причини за загаденост во воздухот, вели министерот за животна средина и просторно планирање Насер Нуредини во гостување на ТВ21.
Нуредини вели дека загадувањето драстично се зголемува помеѓу 16 и 17 часот попладне, и навечер во периодот околу 22, 23 и 24 часот.
„Причината за ова е што граѓаните се враќаат дома и го вклучуваат греењето, но тоа не се само домовите на луѓето, туку и други објекти во државата, а потоа имаме и воздушен притисок. Значи, една од причините, за жал, е греењето во нашите објекти и домови. Друга причина дефинитивно е индустријата што треба да се контролира, и можеби треба да има поригорозни контроли во иднина“,
посочи Нуредини.
Според Нуредини, инвертер климите не се решение за загадување на воздухот.
„Имаме подобрување, но нема да биде нешто драстично и мислам дека треба да бидеме свесни за тоа. Со инвертерите има подобрување, но тоа не е решение“,
вели Нуредини.