Се разгледуваат повеќе опции, како потврда за вакцинација или за антитела, а ќе се разгледа и можноста да се достави и ПЦР – тест, не постар од 14 дена и секако да ги прошириме и дејностите, вклучувајќи ги шопинг моловите, изјави Бектеши, најавувајќи ја утрешната седница на Кризниот штаб
Рестриктивните мерки ги воведуваме со цел да го сочуваме здравјето на граѓаните и да не се вратиме во ситуација на тотален „локдаун“, како претходната година, изјави вечерва министерот за економија Крешник Бектеши, пред утрешниот почеток на спроведување на новите ограничувања за заштита од ширење на ковид-19.
На гостувањето во вестите на „Сител“, Бектеши најави дека на утрешниот состанок на Главниот кризен штаб, ќе биде разгледана и можноста за влез во локали со ПЦР – тест, но не постар од 14 дена.
„Утре имаме Кризен штаб, каде што ќе разговараме за дополнителни мерки, доколку се потребни. Согласно бројките што ги имаме последните денови, се разгледуваат повеќе опции како што се воведување на потврда за вакцинација и потврда за антитела, а дополнително ќе се разгледа и можноста да се достави и ПЦР тест, но не постар од 14 дена, а секако да ги прошириме и дејностите вклучувајќи ги тука и шопинг моловите“,
рече Бектеши.
Ако се почитуваат протоколите и мерките, Бектеши е убеден дека нема да има потреба од затворање на цели дејности.
Најави дека од утре ќе има засилени контроли на Државниот пазарен инспекторат со цел што повеќе да се почитуваат рестриктивните мерки, а за непочитување, рече дека ќе се постапува согласно законот.