Раководителите на државните институции, но и на приватните фирми да ги мотивираат своите вработени да се вакцинираат, бидејќи прележана болест не создава доволно имунитет како што создава вакцината, вели Филипче
Новите мерки против ковид што Владата ги донесе и ќе важат од 16 август се однесуваат за сите организирани настани, семинари, конференциии, посета на угостителски објекти на затворено за што постојат протоколи, но ќе важат и за на отворено, рече министерот за здравство, Венко Филипче на денешната прес-конференција.
Засега нема одлука за институциите, но тој апелира до раководителите на сите државни институции и приватни фирми да ги мотивираат вработените да се вакцинираат.
За присуство на состаноци, конференции, семинари и работилници за кои веќе има протоколи ќе биде неопходно да се приложи сертификат за вакцинација за примена најмалку една доза и потребно е да се обезбедат редарски служби за овие настани. Филипче рече дека за примена на овој механизам ќе биде потребна координација и ќе отвори предизвици и прашања за како сето ова ќе се контролира.
„И досега беше во ингеренциите на инспекторатите да се контролира почитувањето на протоколите и колкав капацитет е пополнет во една просторија. Оваа недела ќе ги направиме тие координации за секој да си ги знае своите ингеренции. Задолжени се сите институции каде се организираат такви настани да имаат редарска служба која ќе ги бара тие сертификати, а понатаму контролата ќе биде преку инспекторат. Имавме стручна дискусија и ставот е дека прележана болест, антитела, односно имунитет од прележана болест не штити доволно, не создава доволно имунитет како што создава вакцината“,
рече Филипче.
Тој посочи дека сосема навремено ги предлагаат сите мерки и дека најавувале повеќе месеци наназад дека ќе ги воведат и го чекале моментот кога за тоа е соодветно. Појасни дека сметаат дека е добар период за овие мерки особено кога се наближува период кога поголем број луѓе ќе бидат во затворено.
„Во таа смисла се и овие координативни состаноци за подготовка на здравствениот систем, сите овие механизми со ротација на кадар, обезбедување распоред на здравствени установи кои би примале пациенти итн. Ние не можеме да предвидиме дали овој раст ќе продолжи или ќе запре. Се надеваме дека ќе запре заради тоа што сепак имаме одредена бројка на вакцинирано население, околу 500 илјади граѓани кои се вакцинирани и следниве недели ќе бидат ревакцинирани. Сметаме дека тоа може да го успори растот. Раст има и во другите земји, меѓутоа мора да ги преземеме овие мерки сега и тие се навремено преземени. Мислам дека ова ќе даде добри резултати со цел другите процеси кои треба да почнат од есенските месеци, на пример училиштата да почнат како што посакуваме“,
рече Филипче.
Додава дека за примена на овие мерки има време од една недела со цел закажаните настани да бидат подобро организирани или доколку организаторите сметаат тие да бидат поместени.