Институтот ги повикува работодавачите да го прифатат законот како мерка за безбедност при работа, а не како казна, работниците да го препознаат своето право на чист воздух, а инспекциите да обезбедат доследна примена на законот за тој да ја исполни својата цел
Институтот за медицина на трудот на РСМ, СЗО Колаборативен центар, упати целосна и недвосмислена поддршка за новиот предлог-закон за заштита од пушење. Од Институтот велат дека целосната забрана за пушење во затворени јавни и работни простории не е рестриктивна мерка, туку е основен здравствен стандард.
Од Институтот особено алармираат за состојбата на работниците во угостителскиот сектор, кои ги посочуваат како една од најранливите групи во државата.
„Овие вработени често се изложени на високи концентрации на тутунски чад во текот на целото работно време, кое често надминува осум часа дневно. За нив, пасивното пушење не е избор, туку сериозен здравствен ризик на нивното работно место“,
велат од Институтот.
Институтот потсетува на научните докази дека не постои безбедно ниво на изложеност на чад или аеросоли. Пасивното пушење, додаваат од Институтот, е докажан причинител за сериозни респираторни заболувања, кардиоваскуларни болести, рак на белите дробови дури и кај непушачите.
Институтот ги повикува работодавачите да го прифатат законот како мерка за безбедност при работа, а не како казна, работниците да го препознаат своето право на чист воздух, а инспекциите да обезбедат доследна примена на законот за тој да ја исполни својата цел.
„Јавното здравје и безбедноста на работниците мора да имаат предност пред комерцијалните интереси. Со спроведувањето на овие мерки, не само што ги штитиме поединците, туку и ја зајакнуваме нашата економија преку намалување на боледувањата и продолжување на животниот век на нашата работна сила“,
додаваат од Институтот за медицина на трудот.
Со нацрт-законот за заштита од пушење, кој од 10. во месецов и официјално е објавен на електронскиот регистар ЕНЕР, се предвидува драстично заострување на државната политика кон пушењето цигари и тутунските производи.
Освен целосна забрана за пушење во јавни и работни простории, предлог-законот изработен од Министерството за здравство предвидува и забрана за рекламирање, промоција и спонзорирање од страна на тутунската индустрија, регулирање на продажбата, прикажувањето и изложувањето на тутунски и никотински производи.