Во неговото последно видео, гласните експлозии од интензивното ракетно бомбардирање на Израел може да се слушнат во заднина додека темното небо е осветлено со блесок од портокалова светлина
Новинарот на Ал Џезира, Анас ал Шариф, е убиен заедно со четворица колеги во израелски напад врз шатор во кој се сместени новинари во градот Газа, пренесуваат светските агенции.
„Седум лица беа убиени во нападот врз шаторот што се наоѓа пред главната порта на болницата ‘Ал Шифа’ во градот Газа доцна во неделата навечер. Меѓу нив се дописникот на Ал Џезира, Мохамед Крејкех, и снимателите Ибрахим Захер, Мохамед Нуфал и Моамен Алива“,
пишува нивниот медиум.
Непосредно пред да биде убиен, Ал Шариф, познат 28-годишен дописник на арапски јазик на Ал Џезира, кој бил во северна Газа, напишал на Икс дека два часа има непрекинато бомбардирање и оти израелската агресија врз градот Газа е интензивирана.
قصف لا يتوقف…
— أنس الشريف Anas Al-Sharif (@AnasAlSharif0) August 10, 2025
منذ ساعتين والعدوان الإسرائيلي يشتد على مدينة غزة. pic.twitter.com/yW8PesTkFT
Во неговото последно видео, гласните експлозии од интензивното ракетно бомбардирање на Израел може да се слушнат во заднина додека темното небо е осветлено со блесок од портокалова светлина.
Нарекувајќи го Ал Шариф „еден од најхрабрите новинари во Газа“, Ал Џезира пишува дека нападот бил „очаен обид да се замолчат гласовите во очекување на окупацијата на Газа“.
Израелската армија вчера објави дека го убила новинарот на Ал Џезира, 28-годишниот Анас ал Шариф, во напад врз градот Газа, обвинувајќи го дека раководел со ќелија на Хамас.
„Ал Шариф беше шеф на терористичката ќелија на Хамас и изведуваше напредни ракетни напади врз израелски цивили и војници на ИДФ. Разузнавачките информации и документите од Газа, вклучувајќи списоци за обука на терористи и евиденција за плати, докажуваат дека тој бил оперативец на Хамас интегриран во Ал Џезира. Новинарската значка не е штит за тероризам“,
пишува израелската војска.
🎯STRUCK: Hamas terrorist Anas Al-Sharif, who posed as an Al Jazeera journalist
— Israel Defense Forces (@IDF) August 10, 2025
Al-Sharif was the head of a Hamas terrorist cell and advanced rocket attacks on Israeli civilians and IDF troops.
Intelligence and documents from Gaza, including rosters, terrorist training lists and… pic.twitter.com/ypFaEYDHse
Од Комитетот за заштита на новинарите (CPJ), каде Ал Шариф минатиот месец рекол дека живее со „чувството дека може да бидам бомбардиран и маченички убиен во секој момент“, по нападот велат дека се згрозени кога дознале за смртта на новинарите.
„Израелскиот модел на етикетирање на новинарите како милитанти без да обезбеди веродостојни докази покренува сериозни прашања за неговата намера и почитување на слободата на печатот“,
рече регионалната директорка на CPJ, Сара Куда, пренесува „Гардијан“.
Според неа, новинарите се цивили и никогаш не смеат да бидат цел, а оние што се одговорни за овие убиства, додава таа, мора да бидат повикани на одговорност.