Доколку посетителот е позитивен и не е потребна хоспитализација, тогаш се сместува во некој од хотелите за карантин, а блиските контакти на заразеното лице во карантин влегуваат доколку се невакцинирани или немаат прележано ковид-19
Десетдневна изолација во хотелите за карантин е предвидено за туристите во Грција доколку бидат тестирани и добијат позитивен резултат, согласно новите, ажурирани упатства на Националната организација за јавно здравје на Грција во однос на карантинот на позитивни случаи и нивните блиски контакти, јави дописничката на МИА од Атина.
Поконкретно, доколку посетителот е позитивен и не е потребна хоспитализација, тогаш се сместува во некој од хотелите за карантин.
За завршување на изолацијата, без разлика дали лицето е вакцинирано или не или дали има прележано ковид-19, во случај да е асимптоматско, потребно е да поминат десет дена од тестирањето, или десет дена и три дена без температура, во случај да има симптоми, како и негативен резултат од брз тест и за двата случаи.
Овие правила и упатства не се однесуваат на зараза со некоја од мутациите на ковид-19, каде што се применуваат специјални протоколи.
Во однос на туристите во Грција кои се блиски контакти на заразеното лице, во карантин влегуваат доколку се невакцинирани или немаат прележано ковид-19.
Како што пишува во упатствата на Националната организација за јавно здравје на Грција, за „укинување на карантинот на блиските контакти на туристите, кои биле дијагностицирани како случаи на ковид-19 на влезните точки или за време на нивниот престој во земјата“, потребно е да поминат седум дена во карантин од последниот контакт со потврдениот случај и на седмиот ден да имаат негативен резултат од молекуларен тест или, пак, да останат 14 дена во карантин без да се тестираат.