Во студијата на Универзитетот во Милано објавена на 7 јануари во британскиот весник за дерматологија се истакнува дека 25-годишната девојка ималa атипичен дерматитис, при што биопсијата покажала присуство на коронавирус
Студија на група научници од Универзитетот во Милано покажа дека девојка од овој италијански град била заразена со коронавирус уште во ноември 2019 година, еден месец пред Кина да пријави случај со овој дотогаш непознат вирус.
Во студијата објавена на 7 јануари во британскиот весник за дерматологија се истакнува дека 25-годишната девојка ималa атипичен дерматитис, при што биопсијата покажала присуство на коронавирус.
Тоа би значело дека таа е „нултата пациентка“ со коронавирус во Италија.
Првиот официјален случај на коронавирус во Италија беше регистриран на крајот на февруари минатата година, но неодамнешното истражување во Италија нуди докази дека вирусот циркулирал многу порано отколку што досега се сметаше.
Најновото истражување координирано од Рафаеле Џаноти од Универзитетот во Милано се заснова на биопсијата на кожа извршена есента 2019 година. Патологијата на кожа се јавува кај помал број пациенти со ковид, односно помеѓу пет и 10 проценти од пациентите заразените со коронавирус.
Претходна студија на италијански научници покажа присуство на коронавирус и во грлото кај четиригодишно момче, поради што беше направен тест на почетокот на декември 2019 година. Детето во ноември имало симптоми на настинка и грип, проследени со осип сличен на сипаници на почетокот на декември.
Првите случаи на коронавирус беа регистрирани во Вухан, Кина, во декември минатата година, иако официјалните лица признаа дека имало случаи и во ноември.
Друга студија од Италија покажа дека коронавирусот може да циркулира во Италија од септември 2019 година.
Експертска екипа на Светската здравствена организација (СЗО) в четврток ќе пристигне во Кина да го истражи потеклото на пандемијата на коронавирусот, соопшти Националната здравствена комисија во Пекинг.