Постои можност државата и во следните 4 месеци да остане без Комисија за спречување и заштита од дискриминација и покрај постојаните барања на невладиниот сектор – новите членови да се изберат пред распуштање на Собранието.
Членови од собраниската Комисија за избори и именувања брифираат дека се прават напори, но тешко ќе успеат да се стасаат роковите за организирање јавна расправа, презентирање на пријавените кандидатите и нивен избор до 12 февруари.
Јавна расправа до крајот на неделава денеска побара пратеничката Ивана Туфегџиќ од претседателот на Комисијата, Илија Димовски. Иако и самиот Димовски истакна дека се пријавиле квалитетни кандидати, сепак, побара време за консултација со претседателот на Собранието, Талат Џафери и координаторите на пратеничките групи за да види дали има време за таа да се организира.
Официјално, сè уште нема договор, но членови од собраниската Комисијата велат дека најверојатно ќе се бара начин како да се пренесе обврската за избор на Антидискриминациска комисија од новиот парламентарен состав. Причината за тоа е да не се поништува и вториот оглас, на кој се пријавија 31 кандидат, а кој Собранието го објави во средината на декември. Првиот оглас се објави на 11 јуни 2019 година, но се поништи поради малиот број заинтересирани за позицијата.
Невладиниот сектор изминатиот период потсетуваше дека реформирањето на системот за спречување и заштита од дискриминација е ветување кое владата на СДСМ не го оствари.
Комисијата за заштита и спречување на дискриминација е нефункционална веќе половина година, односно од 21 август, кога на поранешниот состав, на чело со Александар Даштевски, му престана мандатот со донесувањето на новиот Закон за спречување и заштита од дискриминација. Последниот состав на Комисијата честопати беше критикуван од невладиниот сектор, а воедно имаше и сериозни забелешки во извештаите на Европската комисија дека членовите на ова тело решаваат пристрасно.