За заедничкиот проект за изградба на прекуграничниот тунел меѓу Ѓуешево и Деве Баир, двете страни се договорија да формираат работни групи што до крајот на јули ќе го финализираат текстот на меѓувладиниот договор за отпочнување градежни работи на почетокот на следната година, кој треба да се потпише наесен
Македонска и бугарска делегација вчера во Брисел одржаа заеднички состанок на кој се потврди посветеноста за завршување на прекуграничните делови од железничкиот Коридор 8, а посебен осврт се даде на тунелското решение, информираат денеска од Министерството за транспорт.
На состанокот присуствуваа државниот секретар на македонското Министерство за транспорт, Стефан Волкановски, директорот на ЈП „Железници инфраструктура“, Синиша Ивановски, заменик-министерот за транспорт и врски на Бугарија, Љубен Нанов.
Средбата е во организација на Валентина Суперти, директор за Западен Балкан во Директоратот за проширување и Источно соседство (ДГ ЕНЕСТ).
„На состанокот се договорија чекорите во следните месеци. Меѓу приоритетите е повторно објавување на тендерот за работите на железничкиот дел меѓу Крива Паланка и влезот на прекуграничниот тунел до крајот на 2025 година од страна на Македонија. Се зборуваше и за активностите што се преземаат од бугарска страна“,
се вели во соопштението од ресорното министерство.
Во однос на деталите од средбата, од ресорното министерство велат дека за заедничкиот проект за изградба на прекуграничниот тунел меѓу Ѓуешево и Деве Баир, двете страни се договорија да формираат работни групи што до крајот на месец јули ќе го финализираат текстот на меѓувладиниот договор со цел да се утврдат конкретните обврски на двете страни на техничките, финансиските, градежните и оперативните аспекти.
„Се разговараше за содржината и потпишувањето на Договорот за оваа есен, со што би се отворил патот за отпочнување градежни работи на почетокот на 2026 година. Двете страни се согласија да продолжат со активностите за изградба на прекуграничниот тунел доставен од страна на Македонија“,
информираа од Транспорт.
На средбата е договорено двете страни да ги истражат најсоодветните можности за заедничко аплицирање за финансирање од Европската Унија или од партнерските финансиски институции за заедничка изградба на тунелот.
Европската инвестициска банка (ЕИБ), како што информираат од Транспорт, понуди подготвеност да помогне во техничките дискусии и целокупниот процес.
Последен состанок меѓу македонска и бугарска делегација за железничкиот коридор се одржа минатата година во октомври.
Источниот дел од Коридорот 8 ги поврзува Македонија и Бугарија и е дел од Европскиот транспортен коридор Западен Балкан – Источен Медитеран.
Средбата во Брисел ја најави и министерот за транспорт Александар Николоски по состанокот со неговиот бугарски колега Гроздан Караџов што се случи минатиот месев во Истанбул во рамките на форумот „Глобална транспортна поврзаност“.
Во септември минатата година, Николоски во интервју за „360 степени“ изјави дека тендерот за третата делница од пругата кон Бугарија пропадна – и за изведба и за надзор.
„Статусот е дека ние ги повлековме членовите и со тоа пропаѓа – и за надзор и за изведба“,
кажа тој.
На дополнителното прашање што тоа значи, Николоски рече дека смета оти треба да седнат со бугарската страна и да ги анализираат опциите за проектот.
„Тоа значи дека мислам дека треба да седнеме со Бугарија, јас би и утре ама претпоставувам ќе сакаат да завршат изборите таму и да се формира политичка влада, заеднички да направиме проект, да видиме дали оваа линија е најдобра, да видиме дали има подобра линија, јас мислам дека има и заеднички да направиме проект, заеднички да најдеме финансирање и заеднички да го тендерираме. Само така има логика. Ако правиме башка ние, башка Бугарија, нема да се заврши никогаш, ако настапиме заеднички како соседни држави оти границите се вештачка работа, тогаш мислам дека апсолутно ќе се реализира“,
рече Николоски во октомври 2024 година.