Нов прекин на огнот во Украина, втор обид за евакуација на цивили од Мариупол

Цивилите ќе можат да се евакуираат од Мариупол со автобуси од три места во градот, а ќе ја следат претходно договорената рута, која завршува во Запорожје

Во Мариупол, пристанишен град на југот на Украина е прогласено ново примирје за привремен прекин на огнот, со цел да се овозможи евакуација на цивилното население, соопшти градскиот совет.

Тој ќе биде на сила од 9 до 18 часот по локално време, јавува Би-Би-Си.

Цивилите ќе можат да се евакуираат од градот по претходно договорена рута од 11 часот по локално време.

Евакуацијата од Мариупол е прекината – властите тврдат не е безбедно поради руското гранатирање на градот

Цивилите ќе можат да се евакуираат од Мариупол со автобуси од три места во градот, а ќе ја следат претходно договорената рута, која завршува во Запорожје, соопштија властите.

Можно е да се излезе од градот и со приватни возила, но тие ќе треба да возат зад автобусот во конвој предводен од Црвениот крст.

Ова е втор обид за евакуација на цивили, откако првиот беше прекинат по само неколку часа, поради продолжување на конфликтот, а украинската и руската страна меѓусебно се обвинија дека го прекинале затишјето.