Во ситуација кога расте бројката на заразени со ковид-19 и се најавуваат нови рестрикции, а инспекторите го засилуваат присуството на терен, не престануваат забавите и свадбените веселби низ локалите во земјава
Околу 50 полицајци пристигнале вечерва во кафе-барот „Мош“ во центарот на Скопје, кој и денеска продолжи со работа, откако вчера му била поднесена пријава за пречекорување на работното време, додека таму гостувал српскиот пејач Владо Георгиев.
Стојко Пауновски, директор на Државниот пазарен инспекторат, изјави вечерва за „360 степени“ дека следната недела кафе-барот ќе биде затворен 10 дена. Тој вели дека моментно е на терен во Гостиварско, каде што, исто така, имало случаи на непочитување на протоколите за заштита од ковид-19, ама дека колегите го известиле дека пред кафе-барот „Мош“ пристигнале педесетина полицајци, кои засега не постапуваат затоа што чекаат овластување.
Инспекторите, како што вели Пауновски, вечерва влегле во „Мош“ и им посочиле на вработените да ги оддалечат масите и да отстранат дел од инвентарот, односно да постапат согласно со протоколите и да обезбедат дистанца. Но, кога инспектрите заминале од локалот, сопствениците повторно ги вратиле масите. Потоа, дел од медиумите јавија дека локалот работи и вечерва со многу гости и гласна музика, како и дека повторно настапува Владо Георгиев.
Поради тоа, сега е поднесена и кривична пријава за загрозување на јавното здравје.
Случајот со познатото кафуле во центарот на главниот град не е изолиран. Во ситуација кога расте бројот на заразени со ковид-19 и се најавуваат нови рестрикции, а инспекторите го засилуваат присуството на терен, не престануваат забавите низ локалните во земјава, при што не се почитуваат протоколите за работа. Поради тоа, Пауновски вели дека со мала законска интервенција, треба да им се овозможи на инспекторите на лице место да затвораат локали.
„И мене не ми е јасно што е ова што се случува. Во услови на епидемија, дваесетина сопственици на угостителски објекти, без никакви срам и совест, им го нарушуваат угледот на сите угостители во земјава“,
вели Пауновски за “360 степени”.
Тој посочува дека само во текот на денешниот ден, инспекторите налетале на седум свадби во угостителски објекти во Скопје, Тетово и во Струга. Посебно го посочува случајот со Струга, каде што во еден локал на два ката, во исто време се одржувале две свадби, со по 200 гости.
Рестораните „Престиж“ во Струга, „Мирко 919“ и „Буши“ во Скопје се меѓу оние во кои денеска се правеле свадби, и покрај забраната за организирање прослави, поради епидемијата со ковид-19.
Мери Проданова од Пазарниот инспекторат вели дека е изненадена на колку многу свадби наишле вечерва инспекторите во Скопје, додека правеле контроли низ локалите низ градот. Таа вели дека станува збор за редовни контроли, какви што се правеле и во изминатите денови.
Таа посочува дека Инспекторатот постапува во сите случаи каде што ќе регистрира законски прекршувања и непочитување на протоколите за заштита од ковид-19. Притоа, како што додава, во изминатиот период се поднесени повеќе кривични пријави за загрозување на јавното здравје.