Владејачкиот СДСМ и коалицијата, како што изјави генералниот секретар на партијата и шеф на изборниот штаб, Љупчо Николовски, победуваат во првиот изборен круг или имаат убедливо водство во 28 општини.
Меѓу нив е Град Скопје каде што, според Николовски, Петре Шилегов има предност пред Данела Арсовска.
„Најдоброто доаѓа од коалицијата предводена од СДСМ. Победуваме во Скопје, а победуваме или влегуваме во вториот изборен круг во повеќе од 28 општини и тоа Струмица, Крива Паланка, Делчево, Крушево, Ресен, Дојран, Богданци, Берово, Кривогаштани, Кочани, Карпош, Центар, Пробиштип… Имаме голема предност во Шуто Оризари, во Пехчево, во Демир Капија, Демир Хисар, Маврово, предност во Македонска Каменица, Чашка, Росоман, Ново Село, Старо Нагоричане, Лозово. Пред ВМРО-ДПМНЕ убедливо водиме и во други општини како Куманово, Долнени, Дебарца, Струга“,
изјави Николовски.
Според него, тоа што ВМРО-ДПМНЕ се обидува нерационално да конструира лажна еуфорија е показател за нејзината „политичка неукост“.
„Ова не е арена за навивање, ова е натпревар за да се обезбеди подобар живот на граѓаните. Има и втор круг во локалните избори, затоа `Кочи Мицко`“,
изјави Николовски.
Тој е сигурен дека СДСМ по завршувањето на изборниот процес ќе има повеќе градоначалници од ВМРО-ДПМНЕ.
Николовски вели дека СДСМ го има најголемиот коалициски капацитет на политичката сцена.