Ќе комуницираме со граѓаните преку социјалните и традиционалните медиуми, како и преку дигиталните алатки. Нема да имаме митинзи, ниту големи настани, најавува генералниот секретар и шеф на изборниот штаб на владејачката партија
Безбедна кампања на СДСМ, со почитување на здравствените протоколи и сите мерки за заштита од коронавирусот најавува генералниот секретар на партијата Љупчо Николовски, кој го предводи и изборниот штаб на коалицијата и е носител на листата во третата ИЕ.
„Очекуваме сериозност и одговорност од сите учесници на парламентарните избори што ќе се одржат на 15 јули, тоа значи да имаме фер и демократски избори, но и 100 проценти здравствено безбедни избори“,
порача Николовски, во денешното гостување во вестите на Сител.
Тој нагласи дека помина времето кога се злоупотребуваше гласот на граѓаните и тоа во период од десет години за време на власта на ВМРО-ДПМНЕ. Сега, според него, државата е препознатлива по тоа што огранизира изборни процеси без ниту една дамка.
„И покрај постојаните обиди за одлагање на самите избори, секако поради стравот на ВМРО-ДПМНЕ дека ќе изгуби, мора да обезбедиме фер, демократски и слободни избори и да обезбедиме институции со полн капацитет коишто ќе се справуваат со сите предизвици.СДСМ ќе води 100 проценти безбедна кампања, мораме да го заштитиме јавното здравје и мораме да дадеме целосна поддршка на здравствените работници кои се на првата борбена линија. Ќе комуницираме со граѓаните преку социјалните медиуми, преку традиционалните медиуми, преку дигиталните алатки. Нема да имаме митинзи, нема да има големи настани“,
рече Николовски.
Тој обвини дека ВМРО-ДПМНЕ веќе почнала да ги крши здравствените протоколи.
Само со почитување на протоколите можреме да дадеме пример. Не со кршење на мерките, не со неодговорност, како што деновиве се однесува опозициската ВМРО-ДПМНЕ.Нивната неодговорност не ја манифестираат само преку одење во теретани и во кафеани, еве гледаме дека и во делот на кампањата започнуваат многу неодговорно и тоа граѓаните ќе го казнат“,
нагласи Николовски.