„Се работи за изградба на 23,4 километри железница. Значи дека еден километар железница чини 24 милиони евра, што е убедливо најскап километар железница изграден каде било во светот. Не се работи за брза пруга, туку за регуларна пруга, каде што возот ќе вози со 60 километри на час“, вели министерот за транспорт
Го повикувам државниот јавен обвинител да го земе извештајот на Државниот завод за ревизија и да постапи по него. Тоа е негова законска обврска. Доколку не го стори тоа во следниот период, ќе побарам состанок со него да ми објасни зошто не постапува по наводите на Државниот завод за ревизија.
Ова денеска на прес-конференција го изјави министерот за транспорт Александар Николоски во врска со извештајот од Државниот завод за ревизија за „Реализација на капитални инвестиции финансирани преку буџетот на РСМ, ЕУ фондовите и средства од други меѓународни финансиски институции во надлежност на централната власт и локалната самоуправа“, повикувајќи го и Јавното обвинителство да поведе постапка по оваа ревизија и да ја преиспита работата на Јавното претпријатие „Македонски железници – инфраструктура“ и Јавното претпријатие за државни патишта (ЈПДП).
Според извештајот, за третата фаза од пругата кон Бугарија, како што вели Николоски, вредноста е зголемена за 220 милиони евра, односно на 560 милиони евра, наместо на првично планираните 340 милиони евра, што значе дека, според него, почната е тендерска постапка во крајно нетранспарентен процес, пред избори и во услови кога, како што рече, сите знаеја дека ќе има промени на власта во државата.
Инаку, за третата железничка делница, од Крива Паланка до границата со Бугарија, ревизијата покажала дека бидејќи фазата на планирање и подготвување на проектот трае предолго, постои голем ризик од губење на грант-средствата на ИПА во износ од 60 775 милиони евра, како и идни фискални импликации поради што ќе треба да се обезбедат дополнителни средства од буџетот на државата.
„Се работи за изградба на 23,4 километри железница. Значи дека еден километар железница чини 24 милиони евра, што е убедливо најскап километар железница изграден каде било во светот. А, не се работи за брза пруга, туку за регуларна пруга, каде возот ќе вози со 60 километри на час“,
рече тој.
Понуди на тендерот се доставуваат до денеска, но министерот посочи дека засега не може да направи ништо за евентуално поништување. Најави дека ќе следува процес на евалуација заедно ЈПДП и меѓународните кредитори ќе се разговара за ревидирање на проектот.
„Се работи за најскапата пруга. Но, најбитно е тоа што, со кое јавноста не е запознаена, се работи за железничка пруга која треба да оди од пред Крива Паланка до граница со Бугарија. Пруга која поминува среде град, буквално среде Крива Паланка, што значи дека треба десетици, а можеби и стотици куќи да се рушат, да се иселува население. Најбитно е што завршува во тунел што нема крај. Затоа што според проект, предвидено е поврзувањето со Бугарија да оди преку тунел. Но, тој тунел може да се изгради само до границата со Бугарија. истиот треба да го преземе и да го гради Бугарија од другата страна. Но, во услови кога Бугарија нема направено ниту проект со железничко поврзување со нашата држава. Но, прашање е дали тие тоа би го испроектирале на овој начин. Што доколку од другата страна не може да се направи поврзувањето преку тунел“,
рече тој.
Оваа делница е проектирана во должина од 23,4 километри, а ќе се градат и 22 тунели, вклучително и еден на граничниот премин, 52 моста/вијадукти, како и железнички станици кај Крива Паланка и кај село Жидилово.
Николоски ги повика меѓународните кредитори, кои овозможуваат средства за овој проект, како и оние што даваат грантови, заеднички да седнат и да разговараат дали ова, како што рече, е соодветен начин и дали вреди на овој начин да се трошат народните пари.
Го повика и Јавното обвинителството да го земе ревизорскиот извештај и да влезе во „Македонски железници – инфраструктура“ и целосно да го преиспита работењето на претпријатието и начинот на кој таму се работи.
По промена на раководството во ЈПДП, најави дека ќе побара декласифицирање на договорот со „Бехтел и Енка“ за автопатските делници на коридорите 8 и 10 Д.