„Најдобриот одговор го даде амбасадорот на Велика Британија, дека нема таква работа. Секако дека со земјата ќе соработуваме во борбата против криминалот и корупцијата и борбата против миграцијата. Нема ништо друго освен ист договор како со Фронтекс. Кредибилитетот на британскиот амбасадор не смее никој да го спори“, вели Николоски
Вицепремиерот и министер за транспорт Александар Николоски вечерва информираше дека следната недела во Лондон ќе се потпише договорот за стратешко партнерство со Обединетото Кралство, по принципот Влада со Влада.
Во интервју за ТВ Сител на прашањето дали се вистинити информациите за изградба на кампови за мигранти кои се одбиени за азил во Британија, Николоски рече дека нашите услови за договорот се одамна дефинирани и преговорите се завршени. Според него, во договорот нема таква одредба за такви мигрантски кампови.
„Најдобриот одговор го даде амбасадорот на Велика Британија, дека нема таква работа. Секако дека со земјата ќе соработуваме во борбата против криминалот и корупцијата и борбата против миграцијата. Нема ништо друго освен ист договор како со Фронтекс. Кредибилитетот на британскиот амбасадор не смее никој да го спори. Најдобар демант за оваа тема се месеците и годините што доаѓаат пред нас“,
рече Николоски.
Британскиот амбасадор Метју Лосон на денешната заедничка прес-конференција со премиерот Христијан Мицкоски во Владата, ги демантираше тврдењата дека договорот подразбира прифаќање мигранти од Британија.
„Драго ми е што земјата се согласи на оваа соработка, но таа се однесува на полициската координација меѓу агенциите. Тоа го правиме и со повеќе европски земји. Не станува збор за тоа дека Македонија ќе прифаќа мигранти од Британија“,
истакна Лосон.
Тој додаде дека договорот предвидува интензивна соработка во справувањето со организирани мигрантски групи, размена на доверливи информации и зајакната координација на безбедносните служби.