Во однос на премијата за заемот, вицепремиерот потенцира дека овој процес ќе биде транспарентен за сите граѓани, односно од финансиските институциии ќе се бара трошокот за заемот да биде единствен без скриени и дополнителни ставки
Наредниот вторник веќе ќе имаме формирано Координативно тело за реализација на Договорот со Велика Британија, а Министерството за финансии ќе започне процес за обезбедување на финансии. Уверуваме дека ќе ја избереме најповолната опција за финансирање на проектите, истакна во вечерашното интервју во „Топ тема“ вицепремиерот и министер за транспорт Александар Николоски.
„Очекувам до вторник да сме подготвени со првиот иницијален проект, а тоа е брзата пруга од Табановце до Гевгелија. Владата треба да го задолжи Министерството за финансии да обезбеди финансирање за проектот. Следниот чекор би бил Министерството за финансии низ еден транспарентен и конкурентен дијалог да испрати барање за финансирање до сите релевантни меѓународни финансиски институции и тие да се натпреваруваат меѓу себе која ќе понуди најдобри услови за финансирање. Ние мислиме дека тоа ќе биде Велика Британија, но дај боже да се пријави некој што ќе понуди поинакви услови и поевтино финансирање. На пример, ако Велика Британија понуди дека може да финансира 95 отсто од сумата по одредена камата, а се појави друга држава која може да финанисра 100 отсто од сумата по пониска камата, секако ќе ја избереме другата варијанта”,
рече Николоски.
Во понатамошната постапка, како што објасни тој, ќе се избира изведувач по Законот за јавни набавки.
„Tеоретски, ако тоа би било Велика Британија, после тоа се одбира Велика Британија како финансиер на проектот и влегуваме во реализација на проектот со избор на изведувач и тоа преку нашиот Закон за јавни набавки што јасно ја утврдува процедурата како се избира изведувач за вакви големи проекти. Тоа не е договор во четири очи, но не е ни класичен тендер каде може било кој да се јави, мора да се постават јасни критериуми кој може да учествува бидејќи проектот мора да биде завршен и мораме да бидеме сериозни да не ни се случи Охрид – Кичево или слично. Но наједноставно за јавноста, тоа би бил конкурентен дијалог со компании кои ги исполнуваат условите, а ќе поставиме соодветни критеритуми”,
посочи министерот за транспорт.
Споредувајќи ги договорите на Велика Британија со Турција и Србија, Николоски нагласи дека тие се класични комерцијални договори кои ги следи финансирање со градба, додека во случајот со Македонија имаме политички договор, прв ваков договор потпишан во регионот, со кој ќе се понудат најповолни услови за финансирање.
Во однос на премијата за заемот, вицепремиерот потенцира дека овој процес ќе биде транспарентен за сите граѓани, односно од финансиските институциии ќе се бара трошокот за заемот да биде единствен без скриени и дополнителни ставки.
„Нашето барање за финансирање е да добиеме финансирање со единствен трошок. Да поедноставам, кога земаме кредит, таму вели ЕУРИБОР плус 1, ама после тоа имате уште пет-шест ставки со ситни букви банкарски напишани итн. Нашето барање ќе биде да имаме единствена цена на чинење и ќе ја избегнеме премијата на начин што тоа ќе биде обврска на финансиската институција којашто ќе понуди финансирање и таа да си го вкалкулира во сопственото финансирање. Односно, доколку повлечеме средства од 2 милијарди и доколку ние добиеме камата од 10 отсто, знаеме дека 10 отсто ни е каматата и нема да имаме плус, односно кога ќе го правиме годишниот план ќе знаеме колку треба да враќаме без таа ставка за ова, она итн. Велиме, дајте да бидеме транспаретни пред луѓето и да дадеме целосен трошок, а дали банката ќе ги плаќа провизиите, ќе ги добие како донација или слично, нас не нѐ интересира. Дајте точна каматна стапка. Уверуваме дека ќе имаме најдолга рочност за враќање, најголем грејс-период и најдобра камата”,
истакна вицепремиерот Николоски.