Министерот појасни дека имало многу телевизиски емисии во Бугарија што ја ширеле тезата дека Николоски и бугарскиот министер за транспорт и врски Караџов лажеле во врска со договорот. Сепак, како што потенцира тој, работите треба да се гледаат објективно
Вицепремиерот и министер за транспорт Александар Николоски вечерва во „Топ тема“ на телевизија Телма, осврнувајќи се на потпишувањето на договорот со Бугарија за пругата за Коридорот 8, посочи дека проблемот во суштина бил повеќе инженерски, а не политички.
Министерот појасни дека имало многу телевизиски емисии во Бугарија што ја ширеле тезата дека Николоски и бугарскиот министер за транспорт и врски Караџов лажеле во врска со договорот. Сепак, како што потенцира тој, работите треба да се гледаат објективно.
„Не успеа намерата на поедини сили во Бугарија од инженерски да направат политички проблем. Сега имаме конкретен и цврст договор за изградба на заедничкиот тунел од пругата, а гарант за тоа се Европската Унија и САД. Не беше лесно и за Караџов и треба да му се оддаде признание за таа работа на бугарскиот вицепремиер и министер за транспорт, затоа што сериозни политички структури во бугарскиот политички живот беа против ова. Тие генерално мислам дека не ни знаат што е проектот, но се против добри односи и нормализирање на односите помеѓу Македонија и Бугарија“,
рече Николоски.
Министерот нагласи и дека француската влада и нивниот министер за транспорт и врски одиграл важна улога во склучување на договорот меѓу Македонија и Бугарија.
„Мислам дека министерот сфати дека е инженерски проблем, а не политички и дека треба да се тргне политиката од истиот. И препораката беше да разговараме само на теми коишто се поврзани со функционалноста на проектот“,
додаде Николоски.
На средба во Истанбул, како што посочи вицепремиерот, бил презентиран проектот на „Македонски железници“, со што се нашло решение.
„Јас го презентирав проектот којшто „Македонски железници – инфраструктура“ го има изработено за целиот тунел. Тие го разгледаа и го прифатија после неколку дена. Рекоа дека е одлично направен. Јас ја презедов обврската да ја забрзаме работата на вториот дел од делницата на пругата. Тоа е делот којшто оди од Бељаковце до Крива Паланка. Бељаковце-Куманово го пуштивме. Уште два тунели остануваат непробиени од вкупно 16 коишто ќе ги има на таа траса“,
образложи Николоски.
Тој ја истакна важноста на проектот и за НАТО и САД, кои овој коридор го имаат обележано како стратегиски и безбедносен во овој регион.
„Овој коридор треба да е начин за снабдување на Украина, имајќи предвид дека од Бургас до Одеса е многу кратко патувањето со брод, а другото е железнички и евтин превоз којшто би се користел при реконструкција на Украина или ако продолжи војната при понатамошни активности за одбрана на Украина. Така што е многу значајно и учеството на САД“,
рече Николоски.
Вицепремиерот зборуваше и за други инфраструктурни проекти кои ги договорил со бугарскиот вицепремиер Караџов, а ќе почнат да се реализираат во скоро време.
„Со Караџов договоривме уште две работи. Прво, ќе почнат да градат експресен пат и автопат до Деве Баир, што се случува првпат во историјата на односите на двете држави. И второ, знаете дека Македонија има одлична геостратешка положба, каде што се вкрстуваат двата паневропски коридори 8 и 10, а низ Бугарија поминува Коридорот ‘Струма’. Се договоривме да ги споиме Коридорот 10 и Коридорот ‘Струма’“,
рече Николоски додавајќи дека овој проект би значел поврзување со експресен пат од Македонија преку Смоквица-Валандово и Струмица и Ново Село, а би се финансирал со средства од евтини кредити и грантови, за кои веќе постои интерес од страна на Европската Унија и Европската инвестициска банка.
Македонија и Бугарија ги дефинираа активностите и меѓусебните обврски за изградба на меѓуграничниот железнички тунел на Коридорот 8 со договорот што го потпишаа на 6 ноември вицепремиерот и министер за транспорт Александар Николоски и неговиот бугарски колега Гроздан Караџов, на железничката станица Ѓуешево.
Финансиската конструкција на проектот е над 1,4 милијарда евра. Од нив, околу 200 милиони евра се неповратни грант-средства, додека остатокот ќе биде обезбеден преку кредити од Европската инвестициска банка, Европската банка за обнова и развој и други европски извори. Бугарија, пак, ќе инвестира 1,2 милијарда евра, најголем дел за реконструкција на железничката линија Софија-Радомир-Перник-Ќустендил-Ѓуешево и за изградба на делницата до границата со Северна Македонија, како и за заедничката изградба на тунелот меѓу двете држави.