Потпретседателот на ВМРО ДПМНЕ вели дека партијата нема да отстапи од изборното ветување дека ДУИ ќе биде во опозиција. Според него, доколку некој смета дека треба да соработува со ДУИ, тогаш секако ќе биде во опозиција. Укажува дека нема никаква официјална најава од Таравари дека ќе оди во коалиција со ДУИ, но ако тоа се случи, тогаш ќе се промени реалноста, смета Николоски
Прашањето за предвремени парламентарни избори со локалните за Николоски е затворено. Граѓаните оваа есен ќе решаваат кои ќе бидат нивните општински советници и градоначалници. „Здравје Господ, во 2028 година ќе се мериме пак на парламентарни избори“, рече Николоски во интервјуто за „360 степени“
Вицепремиерот, министер за транспорт и потпретседател на ВМРО-ДПМНЕ, Александар Николоски, е уверен дека исклучително искусен политичар како Арбен Таравари нема да повлече потег со кој би си ги загрозил сопствените позиции. Соработката со ДУИ би била маневар со кој тој би си ги затворил вратите во владината коалиција.
„Тој е многу политички искусен. Јас можеби најмногу од сите што сме во постојнава влада сум го критикувал, но ако тоа го тргнеме настрана, факт е дека тој е политички искусен и не мислам дека е до толку, ај сега обратно да кажам – наивен, да влезе во соработка со ДУИ. Мислам дека малку и јавноста го потценува и не очекувам дека ќе направи чекор каде што политички би се самоубил. Би бил изненаден да покаже таква политичка наивност. Се разбира, не исклучувам такво сценарио, но би бил многу изненаден ако тоа се случи“,
вели Николоски во интервју за „360 степени“ на МРТ 1.
Според него, освен евентуална соработка со ДУИ, не постојат други причини поради кои ВМРО-ДПМНЕ или премиерот би размислувале за прекинување на партнерството со Таравари, бидејќи тој како министер ужива доверба меѓу членовите на кабинетот на Мицкоски.
„Мислам дека и граѓаните се задоволни од она што тој го прави. Имавме огромна трагедија за која тешко дека одговор би можеле да дадат поголеми здравствени системи од македонскиот. Во однос на соработката со ДУИ, за нив нема место во владата. Ако некој од партнерите во ВЛЕН мисли дека може да соработува со ДУИ и на тој начин директно ДУИ да е во Владата, тоа не е реално и ние до таа политика ќе се држиме до крај. Ние добивме мандат со ветување дека ДУИ ќе биде во опозиција. И овие четири години тоа ветување ние ќе го држиме. Доколку некој смета дека со ДУИ треба да соработува, тогаш секако ќе е во опозиција. Но, во овој момент ние немаме никаква официјална најава од Таравари дека ќе оди во коалиција со ДУИ. Значи, ако отиде во коалиција со ДУИ, тогаш ќе се промени реалноста“,
вели потпретседателот на ВМРО-ДПМНЕ.
Николоски е свесен дека постојат искричења меѓу партнерите од ВЛЕН, но апелира тие да седнат на заедничка маса и да ги надминат недоразбирањата. Не затоа што тоа би влијаело врз стабилноста на владата предводена од ВМРО-ДПМНЕ, туку би значело отстапување од повисоката цел во албанскиот кампус, ДУИ пак да има влијание врз политичките текови.
„Дома четири луѓа да се разберете е тешко, а не, пак, четири политички партии со своите интереси. Но, има повисока цел. Кај Албанците, првпат се случува промена. И мислам дека тоа е повисоката цел на којашто треба овие четири политички партии да ѝ служат, и заради таа политичка повисока цел треба да најдат политички договор како да настапат на локалните избори. Дали ќе најдат или нема да најдат, на крај, е нивно. Ние не сме ниту учители, ниту можеме да им бидеме тутори и да им кажуваме што да прават. Ние можеме да ги посоветуваме, можеме да апелираме, но на крај одлуката дали ќе има договор или не е нивна, но не смеат да заборават која е повисоката цел. Инаку, владата е стабилна. Според бројките, дури и ние самите како ВМРО-ДПМНЕ можеме да ја водиме владата. Со ЗНАМ имаме и стабилно мнозинство, но секако реалноста во Македонија е таква и добро е да се имаат партнери од албанскиот блок. Но, доколку некој сака да излезе од владата, имаме доволно голема бројка пратеници да сме комотни, а да ги реализираме проектите“,
вели Николоски, без експлицитно да одговори дали би бил доведен под прашање политичкиот легитимитет на владата меѓу етничките Албанци кога надвор од неа освен Ахмети, би бил и Таравари.
Имајќи ја предвид ваквата констелација, тој сепак смета дека не постојат никакви причини кои би можеле да испровоцираат предвремени парламентарни избори, заедно со локалните.
„Граѓаните минатата година јасно ја изразија својата волја и кажаа кој мисли дека треба да ја води владата. Ние имаме речиси двотретинско мнозинство од 78 пратеници, а има интерес тоа да се зголеми. И доколку посакаме, веројатно би оделе над 81-82 пратеници без никаков проблем. Така што, мислам дека граѓаните минатата година беа јасни, децидни. Има редовни локални избори. Ќе излезат граѓаните, ќе кажат кои сакаат да се нивни советници, градоначалници, и тоа е тоа од изборни активности за годинава. Па, здравје Господ, во 2028 година ќе се мериме пак на парламентарни избори. Тоа е затворено прашање. Есенва ќе има само локални избори“,
порача Николоски во интервјуто за „360 степени“.