Вицепремиерот и министер за транспорт денеска изврши увид на изградбата на автопатот Гостивар-Букојчани-Кичево, за која рече дека е најтешката траса од автопатскиот Коридор 8 на запад. Смета дека оваа делница целосно ќе го промени функционирањето на економијата, туризмот и за економскиот раст
После 50 години, почнува изградба на автопатот Гостивар-Букојчани-Кичево, најтешката траса од автопатскиот Коридор 8 на запад, што значи дека помеѓу главниот град и Охрид и Струга ќе се патува за околу час и половина. Ова денеска го изјави вицепремиерот и министер за транспорт Александар Николоски, посочувајќи дека со оваа делница практично ќе се реши најтешкиот дел од она што треба да е автопат Скопје-Кичево-Струга-Охрид.
„Навистина мислам дека имаме историски ден. Ова целосно ќе го промени функционирањето на економијата, туризмот, а ќе го забрза и економскиот раст. Ова ќе значи и голема поврзаност за сите“,
рече Николоски.
На новинарско прашање каде ќе поминува трасата, Николоски рече дека таа тргнува од третата патарина, па продолжува до Гостивар или до четвртата патарина.
„Тука имаме комплетно ново решение од двете страни по три вкупно, односно шест ленти и плус помошен пат. Оттука го заобиколува градот Гостивар, се движи над реката Вардар, оди на три големи моста што одат лево од Стража, се заобиколува планината Стража, оди по планината и излегува од другата страна кај местото Букојчани. Од Букојчани над Кичево веќе ЈПДП е во претселекција за избор на изведувач за новиот автопат и понатаму од над Кичево до Охрид веќе е автопатот што се гради“,
вели тој.
Премиерот Христијан Мицкоски посочи дека по две години од ветувањата на претходната влада може да се види дека на терен се работи на Коридорот 8.
„Денеска конечно може да се види нешто што треба да претставува дел од оној сон што го имаме како влада, а тоа е како нашата земја да биде држава на три раскрсници. А тоа е да бидеме транспортна, железничка и енергетска крстосница. Тоа е нашиот сон. Тоа е мојот личен сон и ќе сторам се да стане и реалност“,
вели тој.
Според него, интензивирањето на работите почнало уште од првиот контакт со раководството на компанијата „Бехтел и Енка“ во Вашингтон за време на Самитот на НАТО.
„И, еве, гледате кога ќе постигнете заеднички дијалог, кога ќе се разговара, може да се постигне и напредок. Тој напредок можете сега и сите да го видите“,
рече премиерот.
Кон крајот на неделата Мицкоски најави дека ќе го посети и другиот дел од проектот на кој се гради, а тоа е делницата меѓу Прилеп и Битола.
На настанот присуствуваа и американската амбасадорка Анџела Агелер, вицепремиерот Изет Меџити и директорот на Јавното претпријатие за државни патишта Коце Трајановски.