Во таа насока, министерот за транспорт рече дека треба да се испита зошто претходната власт наместо да се бори за интересите на државата се нудела да плаќа народни пари
Имаме големи сомнежи бидејќи ние како влада ги добиваме арбитражните постапки, а претходната влада се нудела да плаќа народни пари во постапките – изјави министерот за транспорт и вицепремиер Александар Николоски во гостување на ТВ Сител за неодамнешните случувања со добивањето на арбитражната постапка против „Казандол“. Министерот повтори оти откако ВМРО-ДПМНЕ ја презела власта минатата година биле добиени три арбитражни постапки и тоа за „Казандол“, „Саса“ и ГАМА, со што, како што кажа тој, се заштедиле вкупно 565 милиони евра од државниот трезор.
Според Николоски, постојат сериозни сомнежи за начинот на кој претходната власт предводена од СДСМ и ДУИ ги водела овие случаи бидејќи, како што нагласи, наместо да се борат за интересите на државата, тие се нуделе да плаќаат народни пари.
„И јас и премиерот изнесовме сомневање во јавноста како е можно и е чиста логика оваа влада добива арбитражи а претходната влада ги губи или отворала арбитражи. Другата работа е како Македонија се изложила на арбитражни спорови, а ние треба да се бориме со силни адвокати и да се донесеме на нула да не плаќаме ништо. Очекувам Обвинителството да ги отвори овие случаи, да види кој работел на овие случаи, кои се лицата кои носеле одлуки и да поведе постапки затоа што изложеноста е огромна или да види на пример кој на 11-12 април од претходната Влада преговарале со претставници на ‘Казандол’ да платат пари, а ние еве го добивме случајот“,
рече Николоски.
нагласи Николоски.
Како посебно проблематичен го издвои случајот со „Казандол“. Според Николоски, завршните зборови биле дадени во 2023 година, а дополнителен товар за Македонија било тоа што на 11 и 12 април истата година во Виена претходната влада водела преговори за спогодба со инвеститорите. Тој порача дека Обвинителството треба да истражи кои лица носеле одлуки и кои лица преговарале во Виена за спорот да се реши со спогодба, што би значело одлив на граѓански пари.
„Завршните зборови се случиле во 2023 година и тоа беше првата отежнителна околност за Македонија, втората отежнителна околност е тоа што претходната Влада на 11-12 април 2023 година во Виена водела преговара за спогодба, а кога водите преговори за спогодба вие признавате вина и третата работа беше што воопшто не се обидувале да обезбедат нови докази. Ние решивме повторно да го отвориме случајот, понесовме барање до Арбитражниот суд во Вашингтон, тие се согласија, понесовме нови докази. Можам само да погодувам зошто претходната Влада не ги доставиле тие докази, а тие докази беа клучни да се сврти постапката во наша корист“,
кажа вицепремиерот.
Николоски рече оти инвеститорите од „Казандол“ понудиле спогодба пред Нова година во вредност од 38 милиони евра, наместо првично побараните 115 милиони евра, со што признале дека ќе го изгубат случајот, но Владата го одбила овој предлог, а според него, тоа бил клучен момент зошто случајот бил добиен.
Министерот во интервјуто посочи дека остануваат уште пет активни арбитражни постапки: за проектот „Шпански скали“ во Скопје вреден 145 милиони евра, за депонијата „Дрисла“ од 95 милиони евра, за Клиничката болница во Штип од 26 милиони евра и за Клиничкиот центар во Скопје од 24 милиони евра.
Дента кога Николоски реферираше пред јавноста оти е добиен спорот со „Казандол“, поранешниот вицепремиер од редовите на СДСМ, Фатмир Битиќи, во објава на социјалните мрежи се осврна на пресудата на Арбитражниот суд, според која државата нема да плати штета од 115 милиони евра како што бараа инвеститорите за нереализираниот проект за рудникот „Казандол“. Тој рече оти случајот околу спорот со инвеститорите, односно судските рочишта се затворени во 2023 година, а Арбитражниот суд носи конечна пресуда во рок од две години по завршните зборови.
Тој рече и дека тимот што ги застапувал правата на нашата држава во целиот тој процес се водел по јасни определби и насоки од страна на неговиот кабинет во претходната влада.