„Ние сме светлина, тие се темнина“, порачаа демонстрантите од пред полициската станица во Белград

Од парламентот до полициската станица во Белград маршираа денеска демонстрантите на десеттиот протест „Србија против насилството“. Намерата на организаторите е да им дадат поддршка на инспекторите и сите чесни полицајци кои ловат државни функционери, пренесува „Нова.рс“. Посебна поддршка демонстрантите изразија кон двајцата инспектори кои го откриле случајот „Јовањица“.

Протести вечерва се одржаа и во Кралево, Крагуевац и во Нови Пазар.

Протестите под слоганот „Србија против насилството“ започнаа во мај по масовните убиства во белградското училиште „Владислав Рибникар“ и во селата Дубона и Мало Орашје во општините Младеновац и Смедерево.

Барањата на демонстрантите се фокусираат на смена на Советот на РЕМ (Регулаторно тело за електронски медиуми), затворање на печатените медиуми и таблоиди кои шират пропаганда и го прекршуваат новинарскиот код, одземање на националните фреквенции од телевизиите кои промовираат насилство, а се бара и оставка на министерот на полицијата Братислав Гашиќ и шефот на безбедносната агенција Александар Вулин.

Протестите се поддржани и од опозициските партии.