Во однос на изјавата на лидерот на СДСМ, Венко Филипче, дека во изминатата година има стагнација во македонските евроинтеграции, премиерот рече дека власта се обидува да ги врати позициите кои биле оставени од опозицијата, додавајќи дека политиката на лесно потпишани договори, предавства и свиткан ‘рбет ја довела државата во оваа ситуација
Ние повикуваме на национален консензус со месеци, но гледате, додека се бориме да ги вратиме изгубените позиции на меѓународната сцена, опозицијата не бира средства како од зад грб да ни забие нож, на тој начин да им се допадне на тие кои не ѝ мислат добро на Македонија, мислејќи дека повторно ќе имаат можност да бидат на власт.
Ова е дел од изјавата на премерот Христијан Мицкоски, која тој ја даде одговарајќи на новинарски прашања во врска со повикот на опозицискиот СДСМ за формирање национален консензус за евроинтеграциите на земјава.
Во оваа смисла премиерот рече дека не може да го коментира тоа што тие го копираат од нив.
„Народот не е со кратко помнење и знае што се случи во седумте години додека беа на власт. Мислам дека опозицијата ја испушта својата можност да се консолидира, да се построи во редот на бранители на македонските интереси и на тој начин колку-толку да врати дел од кредибилитетот кој тие го губеа по две основи – распродавајќи ја Македонија и нејзините национални стратешки интереси и со многу крадење и криминал“,
рече Мицкоски.
Во однос на изјавата на лидерот на СДСМ, Венко Филипче, дека во изминатата година има стагнација во македонските евроинтеграции, Мицкоски повтори дека власта се обидува да ги врати позициите кои во минатото биле оставени од опозицијата, додавајќи дека политиката на лесно потпишани договори, предавства и како што рече, свиткан ‘рбет, ја довела државата во моменталната ситуација.
„Она што го прави оваа влада и македонската дипломатија е да ги врати изгубените позиции, но и на светот да му покаже што се крие зад она кое порано беше кажувано како едноставна работа – да се промени Уставот и завршено е сè, ќе почне мед и млеко да тече по улиците и сè ќе биде перфектно, а во суштина не е така. Проблемот е многу длабок, ние само загребавме по површината и сè излезе, може и светот и македонските граѓани да видат за што станува збор“,
додаде премиерот одговарајќи на новинарски прашања по посетата на фабриката „Реплек“.
Претходно вчера, претседателот на опозициската СДСМ, Венко Филипче, по средбата со еврокомесарката Марта Кос во Скопје, повика на национален консензус во однос на македонските евроинтеграции, оценувајќи дека не е време за калкулации и ситнопартиски интереси.