Според Заев, СДСМ има одлична соработка со ДУИ, БЕСА и ДПА, а коалицијата е стабилна и единствена и, како што истакна, верува во голема победа
Премиерот Зоран Заев, одговарајќи на новинарски прашања по означувањето на почетокот на изградбата на 400-киловолтниот интерконективен далекувод Битола-Елбасан, рече дека разноликоста на кандидатите за градоначалници и советнички листи е потврда за слободата, а слободата носи повеќе демократија.
„Се работи за многу важни избори зашто личностите се доминантни во перцепцијата на граѓаните кои треба да ја дадат довербата за следните четири години. Оттука, многу е логично да се јават повеќе охрабрени граѓани и за советнички листи и за градоначалници“,
рече денеска премиерот Заев.
Според него, СДСМ има одлична соработка со ДУИ, БЕСА и со ДПА, а коалицијата е стабилна и единствена поради што верува во голема победа.
„Имаме одлична соработка со ДУИ, како што имаме и со БЕСА и со ДПА. Поддршката заемно ќе си ја довериме и дадеме, веруваме дека така многу подобро ќе им служиме на граѓаните, пред сè, зашто сме и централна власт, а заеднишвото пресликано на локално ниво ќе биде капацитет повеќе за полесно да се справиме со предизвиците и да имплементираме колку што може повеќе проекти во иднина”,
истакна Заев.
Општините, оцени, не доживеале таква поддршка каква што имаат во изминативе четири години.
„Педесет милиони евра дадовме директно за да се одблокираат општините, за да ги вратат своите долговите. Се реализираат и многу проекти поддржани од ЕУ и Европската банка за обнова и развој, од Светската банка, од меѓународни фондации, но и проекти од централната власт“,
подвлече Заев.