Од Независниот полициски синдикат побараа министерот и дополнителниот заменик-министер за внатрешни работи да застанат во одбрана на работниците и да ги спречат притисоците врз нив
Независниот полициски синдикат бара политиката и политичките кампањи да се реализираат надвор од институциите, а работниците да не се злоупотребуваат за политички цели. Денешната реакција на Независниот полициски синдикат доаѓа по вчерашната ненајавена посета на техничкиот премиер Талат Џафери на СВР Тетово.
Претседателот на Синдикатот, Гоце Делчев, на денешната прес-конференција рече дека техничкиот премиер вчера направил преседан кога, како што рече Делчев, неовластено упаднал и неовластено снимал вработени кои ги извршувале своите работни задачи во СВР Тетово.
Тој побара министерот и дополнителниот заменик-министер за внатрешни работи да застанат во одбрана на работниците.
„Да реагираат и да ги спречат притисоците врз нив, како би ги покажале на дело декларативните заложби на кои укажаа уште првиот ден од техничката влада“,
рече Делчев.
Техничкиот премиер Талат Џафери вчера беше во ненајавена посета на СВР Тетово, а во изјава за медиумите рече дека констатирал оти во овој сектор за внатрешни работи недостига организација во извршување на задачите на дневна основа.
„Како што најавив во Владата, институциите да не се изненадат што без најавување ќе ги проверувам вршителите на работите и обврските што ги имаат. Општ впечаток е дека недостига организација во извршувањето на задачите на дневна основа и релевантната институција во однос на организацијата ќе треба да се потруди примањето на документите да се одвива во една форма и обезбедувањето на готови документи во друга форма. Луѓето чекаат да бидат информирани“,
изјави Џафери.
Тој додаде дека не е во негова надлежност да бара одговорност од вработените, но дека ќе побара одговор од надлежните министри и заменик-министри.