Претставниците од ЛФИ предлагаат сите левичарски групи во Европскиот парламент заеднички да поднесат предлог за изгласување недоверба, за да се стави крај на Комисијата со која раководи Урсула фон дер Лајен
Деветмина европратеници од француската левичарска партија Бунтовна Франција (ЛФИ) најавија иницијатива за изгласување недоверба на Европската комисија поради постигнатиот трговски договор меѓу ЕУ и САД за 15 отсто на царините.
„Европската комисија се согласи да се потчини на САД на Доналд Трамп. Но, делегацијата на ЛФИ го отфрла ова. Предлагаме со другите левичарски групи заеднички да поднесеме предлог за недоверба на Комисијата на Фон дер Лајен“,
пишува на Икс европратеничката Манон Обри, претседателка на пратеничката група Левица во Европскиот парламент.
La Commission européenne a accepté de se faire vassaliser par les Etats-Unis de Donald Trump.
— Manon Aubry (@ManonAubryFr) July 30, 2025
Mais notre délégation @FranceInsoumise le refuse. Nous proposons aux autres groupes de gauche de déposer ensemble une motion de censure pour faire tomber la commission Von Der Leyen. pic.twitter.com/mlI5acvBgP
„Во неделата, на 27 јули, таа склучи договор со Доналд Трамп што ја доведува Европската Унија во вистинска вазална позиција кон САД. Под маската на „избегнување трговска војна“, Комисијата го прифати неприфатливото“,
се наведува во текстот на иницијативата од ЛФИ.
Деветтемина тврдат дека со договорот со кој Вашингтон воведува царини од 15 отсто на Унијата без никаков реципроцитет, ја принудува Европа да потроши 750 милијарди долари за да купува енергенти кои загадуваат и зема 600 милијарди долари европски инвестиции.
„На Трамп му се прават отстапки без видлива компензација, спротивно на европските интереси и т.н. ‘суверенитет’ со кој Брисел мавта во секој говор. Резултатот е јасен: САД победуваат, додека Европската Унија е задоволна што ‘избегна полошо’“,
се вели понатаму во предлогот.
Претставниците од ЛФИ предлагаат сите левичарски групи во Европскиот парламент заеднички да поднесат предлог за изгласување недоверба, за да се стави крај на Комисијата на Урсула фон дер Лајен.
Ова е втора иницијатива за изгласување недоверба на Европската комисија, откако првата предложена од романскиот десничарски европратеник Георге Пипера беше отфрлена со големо мнозинство на почетокот на месецов.
За ваква иницијатива да се најде на расправа на пленарна седница на Европскиот парламент потребна е поддршка од најмалку 72 европратеници, но бидејќи овој пат таа доаѓа помалку од два месеци по претходниот таков предлог, иницијативата на ЛФИ треба да биде поддржана од најмалку 144 европратеници.