На Клиниката за токсикологија во последното деноноќие се примени четири пациенти од странство и по направените анализи се пуштени на домашно лекување
Кај двајца пациенти кои се хоспитализирани во болницата во Солун има одредено подобрување и од вчера се екстубирани, соопштија од Министерството за здравство. Оттаму велат дека тие се преместени од интензивна нега на оддел за пластична хирургија, додека, пак, кај другите пациенти кои се лекуваат во болниците во странство состојбата од вчера е непроменета.
„На Клиниката за токсикологија во последните 24 часа се примени 4 пациенти од странство и по направените токсиколошки анализи се пуштени на домашно лекување. Сите се во добра општа состојба. За денеска нема најава за враќање други пациенти од странство“,
велат од Министерството за здравство.
Оттаму информираат дека во Скопје се лекуваат вкупно 16 пациенти, и тоа по шест во старата градска болница и ГОБ „8 Септември“ и четворица во приватните болници.
Вчера, позитивни вести пристигнаа и од Софија бидејќи директорот на болницата „Пирогов“, каде има згрижено повредени од Македонија, д-р Валентин Димитров, изјави дека сите осум повредени лица од пожарот во Кочани кои беа транспортирани и згрижени во болницата се екстубирани, а само дел од нив користат маска за кислород. Тој рече дека и покрај овие позитивни вести, сепак ситуацијата мора да се мониторира и понатаму бидејќи овој тип изгореници и повреди се тешки и бараат долг третман, оти секогаш постои ризик по живот.