Единствени македонски граѓани кои биле во Кина, но на 2.000 километри оддалеченост од градот Вухан, е една актерска група од МНТ, кои се скенирани на излез на аеродромот во Пекинг и со термална камера во Истанбул
Министерот за здравство Венко Филипче денеска изјави дека во овој момент не гледа ниту една причина за некаков ризик или за појава на паника во нашата земја поради коронавирусот. Досега нема регистрирано сомнителни случаи туку има само вообичаен број заболени од грип.
„Кај нас стигнуваат авиони од Истанбул и од Дубаи. Системот е веќе воспоставен, а камерата што беше поставена вчера е во функција. Направен е распоред на лекари епидемиолози од Центарот за јавно здравје, како согласно редот на летање ќе бидат присутни за време на скенирањето“, рече Филипче одговарајќи на новинарско прашање за коронавирусот.
Филипче соопшти дека единствени македонски граѓани што биле во Кина, но на 2.000 километри оддалеченост од градот Вухан, е една актерска група од МНТ. Тие се скенирани на излез кога го напуштале аеродромот во Пекинг и со термална камера во Истанбул. Во разговорот изминатите два дена тие изјавиле дека немаат никакви симптоми.
Објаснувајќи ја процедурата, доколку се детектира дека некој од патниците има покачена телесна температура, првиот чекор е интервју со епидемиолозите дали доаѓа од Кина и дали имал контакт со некој заразен. Исто така, има протокол за изолација, дезинфекција и на авионот и на просториите и соодветен пат кој веќе е предвиден со тој алгоритам, со посебно возило на Брза помош само за таа цел на Инфективната клиника во Скопје.
Секој што нема директен контакт и не доаѓа од Кина, доколку почувствува некои симптоми ќе оди по нормалниот тек – матичен лекар па Инфективна клиника. Филипче најави дека во текот на денот ќе бидат дистрибуирани летоци на аеродромот со посебен телефонски број и секој што доаѓа ќе има можност да се јави.