Од МЖСПП велат дека резултатите покажуваат оти сите просечни вредности за масена концентрација на PM 10 се движат во рамките на законски дозволените граници и досега не е регистрирано надминување на утврдените прагови
Квалитетот на воздухот во Трубарево e во рамки на дозволените граници, покажале податоците од автоматските мерни станици на Универзитетот „Гоце Делчев“ во Штип.
Мерењата покажале дека просечната дневна концентрација на суспендирани честички со големина до 10 микрометри во текот на вчерашниот ден била 19,7 микрограми на кубен метар.
Во информацијата што ја објави Министерството за животна средина и просторно планирање (МЖСПП) се вели дека максимално измерената вредност е 39 микрограми на кубен метар.
Од табелата може да се види дека моменталната концентрација е 7,5 микрограми на кубен метар.
„Резултатите покажуваат дека сите просечни вредности за масена концентрација на PM 10 се движат во рамките на законски дозволените граници и досега не е регистрирано надминување на утврдените прагови“,
велат од МЖСПП.
Мерењето на квалитетот на воздухот во Трубарево доаѓа откако во саботата се запали фабриката „Ф-групација“ каде што имаше складирано електронски и електричен отпад, а црниот чад што се дигна од пожарот неколку часа можеше да се види од речиси цело Скопје.
Утре, пак, се чекаат резултатите од акредитирана лабораторија кои треба да покажат дали во саботата имало загадување на воздухот со тешки метали. Примероците за овие испитувања се земени веднаш што на теренот се создале услови за тоа.
Резултатите што досега беа објавени од Инспекторатот за животна средина се оние земени со сонда од три клучни места, но тие се само резултати што покажуваат гасови. Бројките покажаа дека концентрациите на сулфур диоксид, азот диоксид и јаглерод моноксид на сите три места се покачени од два до три пати над дозволеното. Јаглерод моноксидот, пак, чија просечна вредност не треба да надминува 10 микрограми на кубен метар, била 300.
Од Инспекторатот рекоа и дека кога теренот ќе биде безбеден ќе се пристапи кон земање на мостри од почва за да се види каква е состојбата и ќе се нареди вештачење за да се види какви биле медиумите за уништување на животната средина во околината на Трубарево.
По пожарот, од Институтот за јавно здравје (ИЈЗ) излегоа со информација дека нема отстапувања од нормалните референтни вредности што би укажале на зрачење, односно, радијација во воздухот во главниот град. И вонредните анализи на земените примероци од вода, покажале дека не е утврдена радиоактивност и нема ниту опасни нивоа на тешки метали во почвата.
Од ИЈЗ рекоа дека било забележано зголемување на два параметра – бакар и цинк само од едно испитано место – површинскиот слој каде што гореле литиумски батерии, но оти тоа е во рамки на очекувањата.