Исклучок ќе биде легализација само на оние објекти што се со намена А1, односно куќи за домување во зоната за одржливо користење и заштитниот појас на подрачјето. Но за нивна легализација ќе биде задолжителна согласност од Министерството за животна средина
Нема можност за легализација на дивоградбите во границите на заштитените подрачја утврдени со закон во строг природен резерват, национален парк, споменик на природата, парк на природата, заштитен предел или заштитен крајбрежен појас на природни и вештачки езера и речни корита и во прва и втора заштитена зона на извори на вода за пиење.
Ова важи и за сите вакви објекти во границите на Охридскиот Регион, а за кои е утврдено дека не се во планот за управување со светското природно и културно наследство во Охридскиот Регион.
Ова стои во предлог-законот за регулирање на статусот на бесправно изградени објекти, со кој се предвидува можност за легализација на дивоградби изградени пред 1 јануари 2021 година, што вчера го усвои Владата, а денеска го презентираа министрите за животна средина и за транспорт и врски Насер Нуредини и Благој Бочварски.
„Ова подрачје како што сите знаеме има природна и културна универзална вредност и во него ќе може да се спроведе легализација само на објектите што се во согласност со планот за управување. Што се однесува до природно заштитените подрачја, никаква легализација на објекти во зоната за строга заштита и зоната за активно управување нема да биде возможна“,
рече Нуредини.
Исклучок ќе биде легализација само на оние објекти што се со намена А1, односно куќи за домување во зоната за одржливо користење и заштитниот појас на подрачјето. Но за нивна легализација ќе биде задолжителна согласност од Министерството за животна средина.
Министерот Нуредини беше прашан и за објекти кои се градат или се веќе изградени во Леуново и на Попова Шапка. И додека за Маврово само повтори дека ќе се легализираат објекти кои се наоѓаат во зона за одржливо користење и заштитениот појас на подрачјето, за Попова Шапка рече дека ќе можат да се легализираат, но сугерира дека Општина Тетово ќе треба да регистрира колку дивоградби има.
„Тие кои се наоѓаат во зона за одржливо користење и заштитениот појас на подрачјето може да се легализираат. Нормално дека Попова Шапка е во заштитениот појас бидејќи ние имаме студии со кои ќе се развие Попова Шапка да биде еден ски-центар и да имаме добра инфраструктура таму за туризмот“,
рече Нуредини, додавајќи дека ќе имаат шест месеци време да ги легализираат, ако не после тоа се уриваат.