Премиерот тврди дека владината коалиција составена од ВМРО-ДПМНЕ, „Вреди“ и ЗНАМ е стабилна и дека граѓаните очекуваат испорака на резултати, а не ново распуштање на Собранието
Владината коалиција функционира одлично и во овој момент нема потреба од одржување предвремени парламентарни избори, порача денеска на прес-конференција премиерот Христијан Мицкоски, нагласувајќи дека главниот фокус на извршната власт остануваат реформите.
Според премиерот, владиното мнозинство составено од ВМРО-ДПМНЕ, коалицијата „Вреди“ и партијата ЗНАМ е стабилно. Тој посочи дека на ВМРО-ДПМНЕ, по апсолутниот триумф на локалните избори, партиски би ѝ одговарало да се оди на ново соочување со граѓаните, но сепак одговорноста е на прво место.
„За да се распушти Парламентот формално се потребни 61 пратеник, а во моментот не гледам потреба за одржување предвремени парламентарни избори. Од она што го разговарам со меѓународната заедница, но и со граѓаните, тие од оваа Влада очекуваат реформи и тоа е нашиот главен фокус и приоритет, реформи и испорака“,
дециден е премиерот.
Премиерот рече и оти неговата партија, ВМРО-ДПМНЕ како најголема политичка партија во земјата мора да се однесува одговорно кон граѓаните, иако резултатите од локалните избори и апсолутниот триумф на партијата им одат во полза за аргументот да има предвремени парламентарни избори, но оти и покрај сето тоа, приоритет се става на подобриот живот и стандард на граѓаните.
На новинарско прашање дали актуелниот министер за социјална политика, демографија и млади, Фатмир Лимани ќе биде разрешен од функцијата, имајќи предвид дека неодамна тој изјави оти планира да формира сопствена политичка партија, Мицкоски рече оти не е информиран за нешто такво.
Министерот за социјална политика, демографија и млади Фатмир Лимани, кој е дел од коалицијата ВЛЕН како кадар на Движењето Беса, се најде во фокусот на јавна препирка помеѓу лидерот на неговата матична партија Билал Касами и премиерот Христијан Мицкоски, во врска со неговиот ангажман во Владата пред десетина дена, откако Касами во интервју за ТВ 21 рече дека голем дел од членството на Беса изразило загриженост за комуникацијата на министерот и дека тој како лидер на партијата може да предложи нов кадар за овој ресор кога на дневен ред ќе дојде реконструкцијата на Владата.
Мицкоски реплицираше оти е задоволен од работата на Фатмир Лимани и дека тој претставува додадена вредност во Министерството за социјална политика, демографија и млади, а дополнително, го потсети Касами дека тој е мандатар на Владата и дека тој одлучува кој ќе биде дел од неа.